شاكەن ايمانوۆ اتىنداعى "قازاقفيلم" ۇلتتىق كينوستۋدياسىنىڭ يەلىگىندە بولعان "كوشپەندىلەر قالاسى" دەكوراسيالىق كەشەنى سىيعا تارتۋ شارتى نەگىزىندە رەسمي تۇردە قونايەۆ قالاسىنىڭ مەنشىگىنە بەرىلدى، دەپ حابارلايدى aqshamnews.kz
قونايەۆ قالاسى اكىمدىگىنىڭ باسپا ءسوز قىزمەتى حابارلاعانداي، "كوشپەندىلەر قالاسىنىڭ" اۋماعى ىلە وزەنىنىڭ سول جاعالاۋىندا ورنالاسقان، اۋماعى 5،8 گەكتار. نىساننىڭ بالانستىق قۇنى – 15،4 ملن تەڭگە. الايدا جىلدار بويعى پايدالانۋ بارىسىندا كەشەن ايتارلىقتاي توزىپ كەتكەن: كەيبىر قۇرىلىستارى جارامسىز بولىپ، باستاپقى كەلبەتىنىڭ ءبىرقاتار ەلەمەنتتەرى جويىلعان.
"قالالىق مەملەكەتتىك اكتيۆتەر جانە ساتىپ الۋلار ءبولىمى ۇسىنعان اقپاراتقا سايكەس، ەندى بۇل نىسان تۇرعىن ۇي-كوممۋنالدىق شارۋاشىلىق بولىمىنە بەكىتىلدى. جوسپاردا – تۋريستىك باعىتتى دامىتۋ، كەشەندى قالانىڭ ۆيزيتتىك كارتوچكاسىنا اينالدىرۋ بار. ونىڭ كۇتىمى مەن اعىمداعى جوندەۋى ءۇشىن بيۋدجەتتەن قارجى بولىنەدى"، – دەدى قونايەۆ قالاسى اكىمدىگى.
اكىمدىكتەگىلەردىڭ ايتۋىنشا، ينفراقۇرىلىمدى دامىتۋ جۇمىستارى باستالىپ كەتكەن. "كوشپەندىلەر قالاسىنا" دەيىن ۇزىندىعى شامامەن 7 شاقىرىم بولاتىن جاڭا جول سالىنىپ جاتىر. سونىمەن قاتار جوبا اياسىندا ەلەكتر بەرۋ جەلىسىن تارتۋ، جول بويىن جارىقتاندىرۋ جانە اۆتوتۇراق ۇيىمداستىرۋ كوزدەلگەن. جولدىڭ ەنى – 7 مەتر، ەكى جولاقتى بولادى. قۇرىلىس جۇمىستارىنا 41 مامان مەن 24 تەحنيكا تارتىلعان. جول قۇرىلىسى جىل سوڭىنا دەيىن اياقتالادى دەپ جوسپارلانۋدا.