بۇرىن بۇل قىزمەتتەردى ىشكى ىستەر مينيسترلىگى اتقارىپ كەلگەن.
كوشى-قون سالاسىنداعى 20 فۋنكسيا ىشكى ىستەر مينيسترلىگىنەن ەڭبەك جانە الەۋمەتتىك قورعاۋ مينيسترلىگىنە بەرىلدى، دەپ حابارلايدى Almaty-akshamy.kz
بۇل تۋرالى مالىمدەگەن ق ر ىشكى ىستەر مينيسترلىگىنىڭ باسپا ءسوز قىزمەتىنىڭ اقپاراتىنا سايكەس، وسى فۋنكسيالاردىڭ اراسىندا ەڭبەك يمميگرانتتارىنا رۇقسات بەرۋ، بوسقىندارمەن جۇمىس، حالىقتىڭ كوشى-قونى سالاسىنداعى ۆەدومستۆوارالىق ۇيلەستىرۋ جۇمىستارىن جۇزەگە اسىرۋ، كوشى-قون پروسەستەرىنىڭ مونيتورينگى سياقتى قۇقىقتىق ءتارتىپتى قامتاماسىز ەتۋمەن تىكەلەي بايلانىسى جوق وكىلەتتىكتەر بار.
«2022 جىلعى قاڭتاردان باستاپ ق ر پرەزيدەنتى جارلىعىمەن كوشى-قون سالاسىنداعى 20 فۋنكسيا ىشكى ىستەر مينيسترلىگىنەن ەڭبەك جانە حالىقتى الەۋمەتتىك قورعاۋ مينيسترلىگىنە بەرىلدى. ول ءۇشىن ەڭبەك كودەكسىنە، «بوسقىندار تۋرالى»، «حالىقتىڭ كوشى-قونى تۋرالى»، «جەكە باستى كۋالاندىراتىن قۇجاتتار تۋرالى» جانە «ىشكى ىستەر ورگاندارى تۋرالى» زاڭدارعا وزگەرىستەر ەنگىزىلدى»، - دەلىنگەن مينيسترلىكتىڭ باسپا ءسوز قىزمەتى تاراتقان اقپاراتتا.
دەگەنمەن، بوسقىندار مەن ەڭبەك ميگرانتتارىنىڭ قازاقستاندا بولۋ ەرەجەلەرىن ساقتاۋ جاعدايى بۇرىنعىسىنشا پوليسيا باقىلاۋىندا بولادى. ياعني، بوسقىن مارتەبەسىن جانە جەكە تۇلعادان ەڭبەك قىزمەتىنە رۇقسات العاننان كەيىن، كورسەتىلەتىن قىزمەتتى الۋشىلار ورنالاسقان جەرى بويىنشا پوليسياعا ۋاقىتشا تۇرۋعا رۇقسات الۋى كەرەك.
«ەڭبەك جانە حالىقتى الەۋمەتتىك قورعاۋ مينيسترلىگىنىڭ بوسقىندارمەن جۇمىسى كوبىنە ولارعا الەۋمەتتىك كومەك، مەديسينالىق قىزمەت جانە ءبىلىم بەرۋگە، سونداي-اق ولاردى جۇمىسقا ورنالاستىرۋعا باعىتتالاتىن بولادى. «ەڭبەك پاتەنتتەرىنىڭ» نەمەسە جەكە تۇلعالاردىڭ ءۇي شارۋاشىلىعىندا جۇمىس ىستەۋگە كەلەتىن ەڭبەك ميگرانتتارىنا رۇقسات حالىققا قىزمەت كورسەتۋ ورتالىقتارى ارقىلى بەرىلەدى. رۇقساتتاردىڭ باسقا تۇرلەرىن جەرگىلىكتى اتقارۋشى ورگاندار بەرەدى. ولاردى بەرۋ ءتارتىبىن ەڭبەك جانە حالىقتى الەۋمەتتىك قورعاۋ مينيسترلىگى ايقىندايدى»، - دەلىنگەن رەسمي تۇسىندىرمەدە.
تۋىنداعان سۇراقتار بويىنشا ەڭبەك جانە حالىقتى الەۋمەتتىك قورعاۋ مينيسترلىگىنىڭ ەڭبەك، الەۋمەتتىك قورعاۋ جانە كوشى-قون كوميتەتىنە تەلەفون ارقىلى حابارلاسۋعا بولادى: 8/717/2-74-37-78، 74-37-26 ق ر ءىىم كوشى-قون قىزمەتى كوميتەتى تەلەفوندارى: 8/717/2-71-40-73،72-20-62.