2022 جىلى 27 ماۋسىم مەن 4 شىلدە ارالىعىندا «كەلىمسەك» جەدەل-پروفيلاكتيكالىق ءىس-شاراسى وتكىزىلدى.
وپەراسيا كەزىندە 12 288 كوشى-قون زاڭناماسىن بۇزۋشىلىق انىقتالدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
پوليسيا قىزمەتكەرلەرى شەتەلدىكتەر كوپ بولاتىن مەكەنجايلاردى، قۇرىلىس وبەكتىلەرىن، نارىقتاردى، زاڭسىز جۇمىسقا الاتىن ۇيىمدار مەن جۇمىس بەرۋشىلەردىڭ نىساندارىن تەكسەردى. وپەراسيا كەزىندە 12 288 كوشى-قون زاڭناماسىن بۇزۋشىلىق انىقتالدى. ونىڭ ىشىندە 8 441ء-ى شەتەلدىكتەردىڭ مەملەكەتتە بولۋ مەرزىمىن بۇزعان، 3 718ء-ى شەتەلدىك جۇمىس كۇشىن زاڭسىز تارتقان.
زاڭسىز شەتەلدىك جۇمىس كۇشىن تارتقانى ءۇشىن 563 جۇمىس بەرۋشى جازاعا تارتىلدى. ال 4 814 شەتەلدىكتىڭ كەلۋى تۋرالى ۋاقىتىلى پوليسياعا حابارلاما بەرمەگەنى ءۇشىن جەكە جانە زاڭدى تۇلعالارعا شارا قولدانىلدى، سونداي-اق 55 شەتەلدىك قايىرشىلىق جاساعانى ءۇشىن جاۋاپكەرشىلىككە تارتىلدى. كوشى-قون زاڭناماسىن بۇزعانى ءۇشىن شەتەلدىكتەردى ەلدەن تىس شىعارۋ تۋرالى 969 سوت شەشىمى شىعارىلدى. ەلدەن تىس شىعارۋ تۋرالى سوت شەشىمىن ورىنداماعان 250 شەتەلدىككە مەملەكەتكە كەلۋىنە تىيىم سالۋ جانە ماجبۇرلەپ شىعارۋ تۋرالى سوت شەشىمى شىعارىلدى.
كوشى-قونعا تالداۋ جاساۋ بارىسىندا شەتەلدىكتەردىڭ ەلگە زاڭدى تۇردە كەلگەنىمەن، كەيبىر جاعدايلارعا بايلانىستى كوشى-قون زاڭناماسىن بۇزۋشىلاردىڭ قاتارىنا اۋىساتىنى انىقتالدى، وعان كوبىنەسە ءبىزدىڭ قازاقستاننىڭ ازاماتتارى كومەك كورسەتۋدە. قۇقىقبۇزۋشىلىقتاردىڭ كوبىسى - ءتيىستى رۇقساتسىز جۇمىسقا تارتۋمەن بايلانىستى بۇزۋشىلىقتار. مىسالى، تۇركىستان وبلىسىندا جازىق جەردە «فەرۋللا» اتتى ءدارى وسىمدىكتى ءوندىرىپ تازارتقان 110 شەتەلدىك انىقتالدى.
نۇر-سۇلتان، شىمكەنت قالالارى، اتىراۋ، قىزىلوردا، ماڭعىستاۋ، شىعىس قازاقستان وبلىستارىندا قۇرىلىس وبەكتىلەرىندە شەتەلدىكتەردىڭ زاڭسىز جۇمىس كۇشىن تارتقان كوپتەگەن فاكتى انىقتالدى. زاڭسىز جۇمىس كۇشىن تارتقان جۇمىس بەرۋشىلەر مەن شەتەلدىكتەر جاۋاپكەرشىلىكتەن جالتارا المادى. ءبىزدىڭ ازاماتتار دا ءوز پايداسىن ويلاپ، كوشى-قون زاڭناماسىن بۇزاتىن شەتەلدىكتەرگە باسپانا بەرىپ قانا قويماي، زاڭسىز كوشى-قون ۇيىمداستىرۋدا كومەك كورسەتەدى.
مىسالى، شىمكەنت قالاسىندا پوليسيا قىزمەتكەرلەرى قايىرشىلىق جاساعان ءۇش شەتەلدىكتى انىقتادى، تەكسەرۋ بارىسىندا ولاردىڭ ەلگە زاڭسىز جولمەن كەلىپ، مەملەكەتتىك شەكارانىڭ باقىلاۋ پۋنكتىنەن تىس كىرگەنى انىقتالدى، سونىمەن قوسا قازاقستان رەسپۋبليكاسىنىڭ ازاماتشاسى شەتەلدىكتەردىڭ تۇرۋى ءۇشىن باسپانا بەرىپ، زاڭسىز بولۋىنا سەپتىگىن تيگىزدى. زاڭسىز كوشى-قوندى ۇيىمداستىرۋ فاكتىسى بويىنشا سوتقا دەيىنگى تەرگەۋ جۇرگىزىلۋدە. پوليسيا كوشى-قون زاڭناماسىن بۇزۋشىلىعىن انىقتاۋ مەن الدىن الۋ بويىنشا ءتيىستى جۇمىستاردى جالعاستىرۋدا.