كەلەسى جىلى قازاقستان مەن وزبەكستان اراسىندا جۇرەتىن اۆتوبۋستار سانى 2 ەسە كوبەيەدى. بۇل تۋرالى وزبەكستان پرەزيدەنتى شاۆكات ميرزيەيەۆتىڭ قاتىسۋىمەن وتكەن وڭىرلەردەگى ءوندىرىستى ودان ءارى كەڭەيتۋ جانە قىزمەت كورسەتۋ سالاسىن دامىتۋ ماسەلەلەرىنە ارنالعان بەينە سەلەكتورلى جيىندا بەلگىلى بولدى.
جيىندا وزبەكستاننىڭ كولىك مينيسترلىگىنە كەلەسى جىلى كەمىندە تاعى 1200 اۆتوبۋس ساتىپ الىپ، مارشرۋتتارعا شىعارۋ تاپسىرىلدى. سونداي-اق قازاقستان، قىرعىزستان جانە تاجىكستانعا اۆتوبۋس قاتىناسىنىڭ 2 ەسە كوبەيەتىنى حابارلاندى.
وزبەكستاننىڭ اۋە قاتىناسى نارىعىندا دا باسەكە پايدا بولدى. ەندى 6 جەكە كومپانيا جۇمىس ىستەي باستايدى. جىل باسىنان بەرى 25 جاڭا ۇشاق جەتكىزىلىپ، 17 باعىت اشىلدى.
سوعان قاراماستان سالاداعى قىزمەت كورسەتۋ كولەمى بار بولعانى 7،7 پايىزعا عانا ءوستى. كولىك مينيسترلىگىنىڭ الدىنا كەلەسى جىلى اۋە تاسىمالى كولەمىن 20 پايىزعا ارتتىرۋ مىندەتى قويىلدى. وسى ماقساتتا تاشكەنت قالاسىن وبلىس ورتالىقتارىمەن بايلانىستىراتىن كۇن سايىن كەمىندە ەكى رەيس، وبلىس ورتالىقتارىن بايلانىستىراتىن اپتاسىنا كەمىندە ءبىر رەيس جاسالادى. كەمىندە 7 ۇشاق اكەلىنىپ، تاعى ءۇش حالىقارالىق باعىت اشىلادى.