دۇنيەجۇزىلىك دەنساۋلىق ساقتاۋ ۇيىمى SARS-CoV-2 كوروناۆيرۋستىڭ جاڭا نۇسقالارىن بەلگىلەۋ ءۇشىن جۇلدىزدار شوعىرىنىڭ اتاۋلارىن ەنگىزۋى مۇمكىن.
بۇل تۋرالى حالىقارالىق ۇيىمنىڭ ساراپشىسى ماريا ۆان كەركحوۆە The Telegraph بريتان باسىلىمىنىڭ بەرگەن سۇحباتىندا ءمالىم ەتكەن، دەپ حابارلايدى Almaty-akshamy.kz DW-كە سىلتەمە جاساپ.
«شاماسى بىزگە گرەك ءالىپبيىنىڭ ارىپتەرى جەتپەيتىن سەكىلدى، كەلەسى اتاۋلار لەگىن قاراستىرىپ جاتىرمىز»، - دەيدى ماريا ۆان كەركحوۆە. ونىڭ ايتۋىنشا، ەجەلگى گرەك قۇدايلارىنىڭ اتىن الۋ ۇسىنىلعان. كەيىن بۇل نۇسقادان باس تارتۋ شەشىمىنە كەلگەن.
ددسۇ ۆيرۋستى شىققان جەردىڭ اتىمەن اتاۋدى ديسكريميناسيا دەپ تانىدى. مامىر ايىنىڭ سوڭىندا ۆيرۋستىڭ جاڭا مۋتاسياسىن گرەك ءالىپبيىنىڭ 24 ارپىمەن اتاي باستادى.
COVID-19 اۋرۋىن تۋدىراتىن SARS-CoV-2 ۆيرۋسى ىندەت باستالعاننان بەرى الەمدە 202 ملن ادامنان تابىلعان. 4 ملن-نان استام ناۋقاس وسى ينفەكسيادان ءولدى. شامامەن 182 ملن ادام دەرتىنەن جازىلعان.