انگليانىڭ سليفورد قالاسىنىڭ تۇرعىنى، 2020 جىلى قىركۇيەكتە COVID-19-بەن اۋىرعان قىز ون ايدان بەرى اۋرۋدىڭ زاردابىن تارتىپ كەلە جاتقانىن ايتتى.
ليليانا دجەكسون اۋىرعانعا دەيىن سالاۋاتتى ءومىر سالتىن ۇستانعان، جۇزۋمەن اينالىسقان. 2020 جىلدىڭ قىركۇيەگىندە قىز ءوزىن ناشار سەزىنىپ، جاڭا كوروناۆيرۋستىق ينفەكسياعا تەست تاپسىرىپ، ناتيجەسى وڭ بولعان، دەپ حابارلايدى Almaty-akshamy.kz Lenta.ru سايتىنا سىلتەمە جاساپ.
«مەن قورىققان جوقپىن، بىر-ەكى اپتا عانا اۋىراتىن شىعارمىن دەپ ويلادىم. مۇنىڭ سونشا ۋاقىتقا سوزىلاتىنىن كىم بىلگەن»، - دەپ ەسكە الادى دجەكسون.
الايدا، ءبىر اپتادان كەيىن ليليانانىڭ قىزۋى كوتەرىلىپ، بۇكىل دەنەسىندە بورتپە پايدا بولۋىنا بايلانىستى اۋرۋحاناعا تۇسەدى. دارىگەرلەر وعان ساۋىعىپ كەتە سالىسىمەن ءبارى جويىلاتىنىن ايتىپ، كوپ ۇزاماي اۋرۋحانادان شىعارعان. ءبىراق ولاردىڭ بولجامدارى دۇرىس بولماي، قىزدىڭ ۇنەمى كەۋدە تۇسى اۋىرىپ، ەنتىگىپ، السىزدىك سەزىنەتىن. جان توزگىسىز نيەۆرالگيالىق اۋرۋىنا بايلانىستى ول قىسقى دەمالىستا قايتادان اۋرۋحاناعا تۇسەدى.
قازىرگى كەزدە ليليانا ون ايدان بەرى اۋرۋدىڭ ازابىن تارتىپ ءجۇر جانە دارىگەرلەر ونىڭ شاعىمدارىن دۇرىس قابىلدامايدى دەپ قاتتى ۋايىمدايدى.
دارىگەرلەر وعان جانە ونىڭ اناسىنا جاسوسپىرىمدەردە «ۇزاق كوۆيد» بولمايتىنىن بىرنەشە رەت ايتقان. «بۇل جاعدايداعى ەڭ جامان نارسە وسى شىعار، ويتكەنى بىزگە ەشكىم ءبىزدى تىڭدامايتىن سياقتى كورىنەدى»، - دەپ شاعىمداندى ليليانانىڭ اناسى.
سايىپ كەلگەندە، دجەكسون الەۋمەتتىك جەلىدە قولداۋشىلار تاۋىپ، «ۇزاق مەرزىمدى COVID»-تەن ەمدەلۋگە كلينيكاعا جاتادى. الايدا سيمپتومدارى ءالى دە تولىق جويىلماعان، بۇل ونىڭ ەمتيحاندارعا دايىندالۋىن قيىنداتىپ وتىر.
«اۋرۋدىڭ كەسىرىنەن ويىمدى دۇرىس تۇجىرىمداۋ جانە ساۋاتتى جازىپ جەتكىزۋ ءۇشىن كوپ كۇش جۇمساۋىم كەرەك»، - دەيدى بريتاندىق قىز. ول ءوزى سياقتى جاعدايعا تاپ بولماس ءۇشىن قۇربىلارىن پاندەميا كەزىندە دەنساۋلىققا جاۋاپكەرشىلىكپەن قاراۋعا شاقىردى.
«ۇزاق COVID» - بۇل ۇزاق جانە اۋىر وتەتىن كوروناۆيرۋستىق جاڭا ينفەكسيانىڭ ءتۇرى. بۇل تەرميندى ۇلىبريتانيانىڭ ۇلتتىق دەنساۋلىق ساقتاۋ قىزمەتى (NHS) رەسمي تۇردە مويىندادى.