ازىق دايىنداۋ جۇمىستارىن ۇيلەستىرۋ ءۇشىن اۋىل شارۋاشىلىعى مينيسترلىگىنىڭ جانىنان رەسپۋبليكالىق جەدەل شتاب قۇرىلدى.
قازاقستان ۇكىمەتى ۇستىمىزدەگى جىلى مال ازىعىن دايىنداۋ جۇمىستارىنا ەرەكشە نازار اۋدارىپ وتىر. بارلىق وبلىستاردا الداعى قىسقا ارنالعان ءتورت تۇلىك مالعا جەم دايىنداۋ جوسپارلارى انىقتالدى، دەپ حابارلايدى Almaty-akshamy.kz.
«بيىل اۋا رايىنىڭ قولايسىزدىعىنا بايلانىستى اتىراۋ، قىزىلوردا، ماڭعىستاۋ، تۇركىستان جانە ءىشىنارا الماتى وبلىستارىندا مالدى ازىقپەن قامتاماسىز ەتۋ جاعدايى قيىندادى. قۇرعاقشىلىق سالدارىنان ماڭعىستاۋ وبلىسىندا جانە قىزىلوردا وبلىسىنىڭ ارال اۋدانىندا مال ءولىمى تىركەلدى. ماڭعىستاۋ وبلىسى بويىنشا 1 147 اۋىل شارۋاشىلىعى جانۋارى نەمەسە وبلىستىڭ جالپى مال باسىنىڭ 0،13%-ى، قىزىلوردا وبلىسى بويىنشا - 492 باس نەمەسە وبلىستىڭ اۋىل شارۋاشىلىعى جانۋارىنىڭ جالپى مال باسىنىڭ 0،03%-ى ءولدى»،– دەلىنگەن اۋىل شارۋاشىلىعى مينيسترلىگىنىڭ باسپاسوز-قىزمەتىنىڭ حابارلاماسىندا .
ق ر اۋىل شارۋاشىلىعى مينيسترلىگى جانىنان جەم-شوپ دايىنداۋ ماسەلەلەرى بويىنشا جەرگىلىكتى اتقارۋشى ورگانداردىڭ ءىس-قيمىلىن ۇيلەستىرۋ ءۇشىن رەسپۋبليكالىق جەدەل شتاب قۇرىلدى. شتاب وتىرىسى ۇنەمى وتكىزىلىپ تۇرادى. وبلىس اكىمدىكتەرىنىڭ جانىنان دا ازىق دايىنداۋ ماسەلەلەرىن تۇراقتى تۇردە مونيتورينگىلەۋ جانە جەدەل شەشۋ ءۇشىن جەدەل شتابتار قۇرىلدى. بارلىق وبلىستاردا الداعى قىسقا ارنالعان اۋىل شارۋاشىلىعى مالدارىنا جەم دايىنداۋ جوسپارلارى انىقتالدى.
قۇرعاقشىلىقتان زارداپ شەككەن وڭىرلەردىڭ فەرمەرلەرى ءۇشىن مال جايۋعا جايىلىمدار بەرۋ جانە ءشوپ شابۋدى ۇيىمداستىرۋ بويىنشا ءوڭىرارالىق ءوزارا ءىس-قيمىل ۇيىمداستىرىلۋدا.
ءشوپ شابۋ ءۇشىن پايدالانىلمايتىن جانە جايىلمالى شالعىنداردى ءبولۋ بويىنشا جۇمىستار جۇرگىزىلۋدە. حالىققا ورمان شارۋاشىلىعى اۋماقتارىندا جانە تابيعي رەزەرۆاتتاردا ءشوپ دايىنداۋ مۇمكىندىگى بەرىلەدى، اۋىل تۇرعىندارىنا ەگىن جيناۋ جۇمىستارىنان كەيىن القاپتاردان سابان جيناۋ مۇمكىندىگى بەرىلەدى.
وبلىس اكىمدىكتەرىنىڭ جەدەل دەرەكتەرىنە سايكەس، 2021 جىلعى 7 شىلدەدەگى جاعداي بويىنشا وڭىرلەر 6،5 ملن توننا ءشوپ دايىندالعان.
ماڭعىستاۋ وبلىسىنا 13 مىڭ ءتۇپ جانە 92 ورام ءشوپ اكەلىندى، اپتا سايىن 5 ۆاگون كەبەك جەتكىزىلۋدە. كورشىلەس وبلىستار اۋماعىندا ءشوپ شابۋ ۇيىمداستىرىلدى. باسقا وڭىرلەرگە ۋاقىتشا 6 470 باس مال تاسىمالداندى. ازىق-تۇلىك كەلىسىمشارت كورپوراسياسى 637 توننا ارزانداتىلعان ارپا جەتكىزدى. ازىق دايىنداۋدى جۇزەگە اسىرۋ ءۇشىن ق ر ۇكىمەتىنىڭ رەزەرۆىنەن 1،9 ملرد.تەڭگە بولىنەدى.
ارال اۋدانىنا 1 مىڭ توننادان استام ءشوپ جانە 40 توننا قۇنارلى جەم جەتكىزىلدى. ازىق-تۇلىك كەلىسىمشارت كورپوراسياسى 600 توننا ارپا جەتكىزەدى. 12 شابىندىق بريگادا قۇرىلىپ، جەم-شوپ تاسۋعا 127 اۆتوماشينا جۇمىلدىرىلدى. كورشىلەس اقتوبە وبلىسىنان ءىرى جەم-شوپ جەتكىزۋ ۇيىمداستىرىلدى.
مال ازىعىن دايىنداۋ جانە قامتاماسىز ەتۋ ماسەلەلەرى اۋىل شارۋاشىلىعى مينيسترلىگى مەن وبلىس اكىمدىكتەرىنىڭ تۇراقتى باقىلاۋىندا.