دونور رەتىندە قان تاپسىرۋ - يگى ءىس
ماماندار قازاقستاندىقتاردى دونورلار قاتارىنا قوسىلىپ، ءجيى قان تاپسىرىپ تۇرۋعا ۇندەيدى. كوروناۆيرۋسپەن اۋىراتىن ازاماتتار دا بۇل يگى شاراعا اتسالىسا الادى. مەديسينالىق قارسى كورسەتىلىمدەرى جوق جانە سالماعى كەمىندە 50 كگ بولاتىن ءاربىر ەرەسەك ادام دونور بولا الادى، دەپ حابارلايدى Almaty-akshamy.kz
«ەگەر ادام الكوگولدىك ىشىمدىك ىشكەن بولسا، ول 48 ساعاتقا قان تاپسىرۋدان بوساتىلادى. ال تۇماۋعا شالدىققاندار ەكى اپتاعا، باسپامەن اۋىرعاندار ەكى ايعا دەيىن، كوروناۆيرۋس ەكى اپتاعا، پنيەۆمونيا بولسا، ءبىر ايعا دەيىن دونور بولۋدان شەتتەتىلەدى. قان تاپسىرۋعا مۇلدەم بولمايتىن ءبىرقاتار قارسى كورسەتكىشتەر دە بار. ماسەلەن جۇرەك-قانتامىرلار جۇيەسىنىڭ اۋرۋلارى، ميوكارديتتەر، ەندوكارديتتەر نەمەسە ساراپتاما قورىتىندىسىنا سايكەس گەپاتيت ب،س، ۆيچ، سيفيليس انىقتالسا»، - دەيدى ترانسفۋزيولوگيا عىلىمي-وندىرىستىك ورتالىعى بولىمشەسىنىڭ مەڭگەرۋشىسى ايگەرىم ساعامبايەۆا.
ەلورداداعى ترانسفۋزيولوگيا عىلىمي-وندىرىستىك ورتالىعىنىڭ دەرەكتەرىنە سايكەس، وتكەن جىلى دونورلاردىڭ باسىم بولىگىن ەر ادامدار قۇراعان. بۇل شامامەن 69%. قان تاپسىراتىن ايەلدەردىڭ قاتارى ازداۋ. دونورلاردىڭ دەنىن 30-50 جاس ارالىعىنداعى ادامدار، 13%-ىن 50 جاستان اسقاندار قۇراسا، قالعان بولىگى - 18-30 جاس ارالىعىنداعى ازاماتتار.
«دونورلىققا ءبىرىنشى رەت كەلىپ تۇرمىن، كوپتەگەن ادامدار تاپسىرىپ جاتىر. قان تاپسىرۋ - وتە پايدالى ءىس. ءبىر جاعىنان، ازاماتتىق بورىشىم دەپ ەسەپتەيمىن. از دا بولسىن پايدام ءتيسىن دەگەن نيەتپەن كەلىپ وتىرمىن. بارلىقتارىڭىزدى قان تاپسىرۋعا شاقىرامىن» - دەيدى دونور احمەت شىلدەباي.
قان تاپسىرۋ ءۇردىسى ۇزاققا سوزىلمايدى. ءوزىنىڭ جەكە ۋاقىتىنىڭ ءسال بولىگىن ءبولۋ ارقىلى بىرەۋدىڭ ءومىرىن امان ساقتاپ قالۋعا بولادى، - دەيدى ماماندار.