نە بايقادىڭىز؟
الماتىنىڭ رەسپۋبليكا سارايىندا ۇلكەن ءانشىنىڭ كونسەرتىندە وتىرمىز. زال لىق تولى. جاس تا، كارى دە وسىندا. ءتىپتى، كورەرمەندەر اراسىندا اۋزىندا ەمىزىگى بار ءسابي دە، اياعىن اپىل-تاپىل ەندى باسىپ جۇرگەن بالدىرعان دا بار.
وسى كۇنگى بالا، جالپى بالا اتاۋلى ءبىر ورنىندا وتىراتىن با ەدى، ونىڭ ۇستىنە كىشكەنتاي ءبۇلدىرشىن كونسەرتىڭىزدى قايدان ۇقسىن؟! ءانشى جانىن جەپ ءان ايتىپ جاتسا، الگىندەي بالاقايلاردىڭ ءبىرى «شولدەدىم، اپا، سۋ» دەدى. ەكىنشىسى ەكى كوزىن ۋقالاي مىجعىلاپ، ۇيقىسى كەلىپ، اناسىنا كونبەي باسىن شالقايتىپ، مازاسىزدانىپ كەتتى. سوسىن امال جوق، «جىلاپ، اينالانىڭ مازاسىن الماسىن» دەگەندەي، الدىنا الىپ سەكىرتىپ ويناتا باستادى بالانى. بالكىم، ۇيدەگى جايلى توسەگىن، بەسىگىن ساعىنعان بولار، ءبارىبىر تىنشىمادى بالدىرعان. سونادايدان ءبىر ايەل ورنىنان ۇشىپ تۇرىپ، تىپىرلاپ كەتتى. نە بولىپ قالدى ەكەن دەپ، ءبىز دە ەلەڭدەپ قالدىق. سويتسە، كونسەرتكە ەرتىپ اكەلگەن وقۋشى بالاسىنىڭ ساۋ ەتىپ مۇرنى قاناپ كەتىپتى. وعان جانىندا وتىرعان ءبىر ەركەك بەتورامالىن الا جۇگىرىپ، بايەك بولدى دا قالدى. سەنسەڭىز دە، سەنبەسەڭىز دە، ءبىر كونسەرتتەن كۋا بولعان وقيعالارىمىز وسى.
وتكەندە تەاترعا باردىق. ساحنادا قويىلىم ءجۇرىپ جاتقاندا ءبىر ەركەك تەلەفونمەن ۇيىندەگى الدەكىمگە جوعالتقان زاتىنىڭ تۇرۋى مۇمكىن جەرىن ايتىپ، ءتۇسىندىرىپ جاتىر. ونى ايتامىز-اۋ، تەلەفونمەن توڭازىتقىشتاعى ەتىن شىعارتىپ قويىپ جاتقان ايەل دە جانىمىزدا وتىردى. ۇيالى تەلەفونىن شۇقىلاپ وتىراتىندار تۋرالى ايتپاي-اق قويايىق. ولار كوپ. «شانشار»، «الداراسپان»، «ءازىل الەمىندە» دە وسىنداي كورىنىستەر. كۇيىس قايىرعان سيىرداي ساعىز شايناپ وتىراتىنىمىز دا بار. سوسىن ءبىزدىڭ كونسەرت اياقتالار-اياقتالماستان دۇركىرەي كيىم ىلگىشكە قاراي جۇگىرەتىن، كەزەكتە تۇرعانداردى يتەرىپ، باسىپ-جانشىپ كيىم الاتىنىمىز دا جاسىرىن ەمەس. سوندا ءبىز ءالى دە كونسەرتكە، تەاترعا بارۋ مادەنيەتىن بىلمەيمىز-اۋ.
راس، شەتەلدىڭ كونسەرتىنە بارىپ كورمەدىك. ءبىراق تەلەديداردان بايقاساڭىز، كەشكىلىك كونسەرتتەردە بانتيك تاققان ءبىر ءبۇلدىرشىندى نەمەسە ۇرپەك باس ءبىر بالاقايدى بايقامايسىز، زالدا ءسان-سالتاناتى كەلىسكەن كىلەڭ پاراساتتى ۇلكەن كورەرمەندەر، مادەنيەتتى تىڭدارماندار وتىرادى. ولار بالا-شاعاسىن بالالارعا ارنالعان قويىلىمدارعا، كونسەرتتەرگە، قۋىرشاق تەاترىنا نەمەسە سيرككە اپارادى. ال بىزدەگى كورىنىس جوعارىداعىداي.
تاربيەنى بەسىكتەن باستاۋ كەرەك دەيمىز عوي. نەگىزى، تاربيەنى سول بەسىكتى تەربەتكەن انادان باستاۋ كەرەك-اۋ، ءاسىلى!
نەگىزى، وپەرا، بالەت، تەاتر، كينو، كونسەرتتەرگە بارۋدىڭ دا ەتيكەتى بار. ماسەلەن، ءدال كونسەرت بولاتىن كۇنى اۋىرىپ تۇرساڭىز، بارماعانىڭىز دۇرىس. جوتەلىڭىزبەن نەمەسە باسقا دا جايسىز جاعدايلارمەن جانىڭىزدا وتىرعان كورەرمەننىڭ ويىن، كوڭىلىن بولەسىز.
تەاتر نەمەسە كونسەرتكە كلاسسيكالىق ستيلدەگى كيىممەن كەلۋ كەرەك. سپورتتىق كيىممەن كەلۋ ابەستىك، ارينە. ءتىپتى، كوشەگە، دۇكەنگە ۇستايتىن سومكەڭىزبەن بارماعان ءجون. ءاتىردى قۇيىپ سەۋىپ الۋ دا دۇرىس ەمەس.
كورەرمەن زالىنا تىسكە باسار تاتتىلەر، سۋسىندار جانە باسقا دا تاعامدارمەن كىرۋگە بولماي̆دى. ۇيالى تەلەفونىڭىزدى ءوشىرىپ نەمەسە دىبىسسىز رەجيمگە قويىڭىز. كونسەرت نە سپەكتاكل كەزىندە تۇسكەن قوڭىراۋلار ءوزىڭىزدى نەمەسە كورەرمەندەردى عانا ەمەس، ءانشى، اكتەرلەردى دە الاڭداتادى. ورىنعا اۋەلى ەر ادام وتىرادى، سوڭىن الا ايەل ادام جايعاسادى. سىزدەن ارىرەك ورىنعا وتىراتىن ادام ءسىزدىڭ الدىڭىزدان وتەردە سىرتىن بەرمەي، بەتىن قاراتا وتۋگە ءتيىس.
زالدان تانىسىڭىزدى كورىپ قالساڭىز، سونادايدان ايقايلاپ امانداسۋدىڭ كەرەگى جوق، ءجاي عانا باسىڭىزدى يزەپ، يشارات جاساڭىز.
بىلاي قاراعاندا، بۇل ەتيكەتتەرگە ەشقانداي دا ءبىلىم، اقىل قاجەت ەمەس تە سەكىلدى. سالتاناتتى زالدىڭ ءوزى ادامدى مادەنيەتكە ۇندەپ تۇراتىنداي مىسى بار. سوعان يكەمدەلسەك جەتىپ جاتىر.
تەاتردا، الدە كونسەرتتە جۇزدەسكەنشە!