تاكسيگە 3 جولاۋشى وتىرا الادى
سەۋل تۇرعىندارى ءۇشىن وزدىگىنەن جۇرەتىن تاكسي قىزمەتى ىسكە قوسىلدى. ازىرگە اۆتونومدى كولىك قىزمەتىن بارلىعى بىردەي پايدالانا المايدى. ءبىراق كۇزگە دەيىن كورەيانىڭ كەز كەلگەن تۇرعىنى مۇنداي كولىككە تاپسىرىس بەرە الادى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
جۇرگىزۋشىسىز تاكسيدىڭ العاشقى جولاۋشىسى كولىك ءمينيسترى مەن سەۋل باسشىسى بولدى. VIP-تەردىڭ قاۋىپسىزدىگى ءۇشىن جۇرگىزۋشىنى وتىرعىزدى. ءبىراق ول ءىس جۇزىندە تۇيمەلەردى باسپادى.
اۆتونومدى تاكسيدە جۇرگىزۋشىنىڭ كوزى مەن قۇلاعى - كامەرا. كولىكتىڭ ىشىندە بەرىلىس قورابى جوق. ال ديسپلەيدە تاكسيدىڭ الدى مەن ارتىنداعى قوزعالىس تۋرالى بارلىق قاجەتتى اقپارات بار.
جاڭا تەحنولوگيالار ايگىلى پساي انىمەن تانىمال كاننام ايماعىندا كورسەتىلدى. بۇل كوشەلەر كورەياداعى كەپتەلىس ەڭ كوپ كەزدەسەتىن داڭعىلدىڭ ءبىرى. ءبىراق، جاساندى ينتەلەكت تاجىريبەلى جۇرگىزۋشىدەن كەم ەمەس. ويتكەنى، وعان 26 جولعا ورناتىلعان قۇرىلعىلار كومەكتەسەدى. سوندىقتان جۇرگىزۋشىسىز ماشينا جاياۋ جۇرگىنشىلەردى جانە باعدارشام تۇستەرىن سەزەدى، ءبىر جولاقتان ەكىنشى جولاققا اۋىسا الادى. تاكسي كەپتەلىس تۋرالى اقپارات الىپ، باعىت بويىنشا ەڭ تەز جولمەن بارادى.
«ءوزىن ءوزى باسقاراتىن ماشينالارمەن اينالىساتىن كومپانيالار 2024 جىلعا دەيىن 4-دەڭگەيدەگى ءوزىن-وزى باسقاراتىن كولىكتەردى ساتۋعا قاجەتتى ستاندارتتارعا ساي بولادى. ءبىز سپۋتنيكتىك بايلانىس، 3D كارتالارى سياقتى ينفراقۇرىلىمدى بەلسەندى تۇردە كەڭەيتۋدى جوسپارلاپ وتىرمىز. سونىمەن قاتار، اۆتونومدى كولىكتەرمەن اپات بولعان جاعدايدا قولدانىلاتىن ساقتاندىرۋ جاۋاپكەرشىلىگى ستاندارتتارىن دايىندايمىز»،-دەيدى كورەيا جەر، ينفراقۇرىلىم جانە كولىك ءمينيسترى ۆون حي رەن.
جۇرگىزۋشىلەر مەن جاياۋ جۇرگىنشىلەرگە قولايسىزدىق تۋدىرماس ءۇشىن تاكسي جۇمىس كۇندەرى ساعات 10-نان 16-عا دەيىن جۇمىس ىستەيدى. ويتكەنى، بۇل ۋاقىتتا كەپتەلىس از. تاكسيگە 3 جولاۋشى وتىرا الادى. جۇرگىزۋشىسىز كولىككە قوسىمشا ارقىلى تاپسىرىس بەرۋگە بولادى. تولەماقى ونلاين رەجيمىندە تولەنەدى. ازىرگە بۇل قىزمەت تەگىن.
«ازىرگە 2 تاكسي عانا جۇرەدى. ۇكىمەت 2025 جىلعا قاراي اۆتوبۋستارمەن قامتاماسىز ەتۋگە تىرىسادى. ال 2030 جىلعا قاراي كورەيانىڭ كەز كەلگەن جەرىندە جۇرگىزۋشىسىز تاكسيگە تاپسىرىس بەرۋگە بولادى دەپ جوسپارلاپ وتىرمىز»،-دەيدى كورەيا جەر، ينفراقۇرىلىم جانە كولىك مينيسترلىگىنىڭ ءبولىم باستىعىنىڭ ورىنباسارى لي حيانگ.
كەلەسى جىلى اۆتونومدى تاكسي ايماعى ەكى ەسەگە ارتادى. جۇرگىزۋشىسى جوق كولىكتەر ۇزىندىعى 49 شاقىرىمعا جۋىق جولداردا جۇرەدى. الداعى 3 جىلدا ينتەللەكتۋالدى كولىك جۇيەسىن دامىتۋعا كورەيادا شامامەن 876 ميلليون دوللار جۇمسايدى.