كۇننەن قۋات الاتىن دروندار جەڭىل ءارى ۇزاق ۇشا الادى
وڭتۇستىك كورەيادا 4 جارىم مىڭنان استام درون قىزمەتتە ءجۇر. بۇل دروندار ادامداردى قۇتقارادى، قىلمىسكەردى ۇستايدى، تاماق تا جەتكىزىپ بەرەدى. ايتەۋىر جۇمىستىڭ قاي تۇرىنە دە ەرىنبەيدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
ەلدە 4 جىل ىشىندە درون نارىعى 7 ەسە وسكەن ەكەن. مۇنداي دەرەك سەۋلدەگى مامانداندىرىلعان كورمەدە ايتىلدى.
كورەيادا جىل سايىن ۇشقىشسىز ۇشاتىن اپپاراتتىڭ جۇزدەگەن جاڭا ۇلگىسى پايدا بولادى. ال ۇكىمەتتىڭ باستى ماقساتى اتموسفەراعا شىعاتىن زياندى قالدىقتاردى ازايتۋ بولعاندىقتان بالامالى ەنەرگيا كوزدەرىمەن جۇمىس ىستەيتىن دروندار جاسالا باستادى. بۇل قۇرىلعى كۇن ارقىلى زاريادتالادى. ول 56 جارىم ساعاتتان استام ۋاقىت توقتاماي ۇشىپ، كورەي رەكوردىن جاڭارتتى.
«كۇننەن قۋات الاتىن دروندار جەڭىل جانە ۇزاق ۇشا الادى. كۇندىز باتارەيالار كۇننەن قۋات الادى، تۇندە وسى ەنەرگيامەن ۇشادى. باسقا كولىكتەر اككۋمۋلياتوردى زاريادتاۋ ءۇشىن جەرگە ءتۇسۋى كەرەك، ال بىزدىكى اسپاندا ۇزاق تۇرادى. سوندىقتان ول تابيعي اپاتتاردى، ورمان ورتتەرىن باقىلاۋ جانە اقپارات جيناۋ ءۇشىن قولدانىلادى»،-دەيدى زەرتتەۋشى چون دجە پەك.
ۇشقىشسىز اپپاراتتىڭ تاعى ءبىر جاڭا قۋات كوزى سۋتەگى. جانارماي باگى پلاتينا قوسىلعان ماتەريالدان جاسالعان، سوندىقتان ول وق وتكىزبەيدى. بۇل ونى جارىلۋدان قورعايدى. ءبىراق سوعان قاراماستان مۇنداي ۇشقىشسىز ۇشاق اسكەري ەمەس، ازاماتتىق ماقساتتا جاسالعان.
«بۇگىنگى كۇنگە دەيىن دروندى الىس قاشىقتىققا جىبەرۋ مۇمكىن بولمادى. مىسالى، باقىلاۋشى ۇشقىشسىز اپپارات زاريادتاۋ ءۇشىن بىرنەشە رەت قايتىپ ورالۋعا ءماجبۇر بولدى. سۋتەگى اپپاراتى ءبىر ۇشقاندا ءوز مىندەتىن ورىنداي الادى. مىسالى، ول ۇزاق قاشىقتىقتاعى نىسانعا جەتكىزۋ، اۋىلشارۋاشىلىق جۇمىستار، ءتىپتى دەزينفەكسيالاۋدى دا اتقارا الادى. ونىڭ ارنايى مەحانيزمى بار»،-دەيدى كومپانيانىڭ ءبولىم باستىعى چوي حو دجين.
دروندى باسقارۋدى ۇيرەتۋگە ارنالعان ارنايى كومپيۋتەرلىك باعدارلامالار بار. كورمەگە كەلۋشىلەر دە وزدەرىن ۇشقىش رەتىندە سىناپ كوردى.