ساراپشىلار تەل-اۆيۆتى الەمدەگى ەڭ قىمبات قالا دەپ اتادى
الەمدەگى ەڭ قىمبات قالالاردى تەل-اۆيۆ، سينگاپۋر مەن پاريج باستاپ تۇر، دەپ حابارلايدى Almaty-akshamy.kz ulysmedia.kz-كە سىلتەمە جاساپ.
The Economist باسىلىمى 2021 جىلى تۇرۋعا ەڭ قىمبات ون قالانىڭ رەيتينگىن جاريالادى. باسىلىمنىڭ اناليتيكالىق بولىمشەسى – Economist Intelligence Unit (EIU) مالىمەتى بويىنشا، 2021 جىلى ينفلياسيا بەس جىلدىق رەكوردتى جاڭارتقان. ەگەر 2020 جىلى ساراپشىلار قاراستىرعان قالالارداعى ينفلياسيانىڭ ءوسىمى 1،9%-دى قۇراسا، 2020 جىلى بۇل كورسەتكىش 3،5%-عا جەتكەن. رەيتينگتى قۇراستىرۋ كەزىندە ونىڭ اۆتورلارى 173 ءىرى قالاداعى 400-دەن استام ءارتۇرلى ساناتتاعى تاۋار باعاسىنىڭ ديناميكاسىن سالىستىرىپ شىققان.
ساراپشىلار تەل-اۆيۆتى (يزرايل) الەمدەگى ەڭ قىمبات قالا دەپ اتادى. بۇل قالا العاش رەت EIU رەيتينگىندە كوش باستادى. ەكونوميستەردىڭ دەرەگىنشە، 2021 جىلى قالادا ازىق-تۇلىك، تۇرمىستىق تاۋارلار، اۆتوكولىكتەر مەن جانار-جاعارمايدى قوسا العاندا، تاۋارلار ساناتىنىڭ 10%-نىڭ باعاسى ايتارلىقتاي وسكەن. بايانداما اۆتورلارى باعانىڭ كوتەرىلۋىنە ۇلتتىق ۆاليۋتانىڭ دوللارعا شاققانداعى باعامىنىڭ نىعايعانىن ايتىپ وتىر.
ەكىنشى ورىنعا بىردەن ەكى قالا – بىلتىر ءتىزىمنىڭ ءبىرىنشى قاتارىندا تۇرعان سينگاپۋر مەن پاريج جايعاستى. ەكونوميستەر شۆەيساريالىق سيۋريح پەن گونكونگتى ءتورتىنشى جانە بەسىنشى ورىندارعا ورنالاستىردى. وسىلايشا، ەڭ قىمبات 10 قالانىڭ قاتارىنا نەگىزىنەن ەۋروپالىق جانە ازيالىق قالالار كىرەدى: جەتىنشى جانە سەگىزىنشى ورىنداردا شۆەيساريانىڭ جەنيەۆاسى مەن دانيانىڭ كوپەنگاگەنى تۇر. ال جاپونيانىڭ وساكا قالاسى وندىقتى تۇيىندەيدى. امەريكا قۇراما شتاتتارىندا ساراپشىلار باعانىڭ ايتارلىقتاي وسكەنىن بايقامادى. ءبىراق امەريكانىڭ ەكى قالاسى ءتىزىمنىڭ باسىنا شىقتى: نيۋ-يورك (6-شى) جانە لوس-اندجەلەس (9-شى).
ءومىر سۇرۋگە ەڭ ارزان قالالار – سيريانىڭ استاناسى داماسك پەن ليۆيانىڭ استاناسى تريپولي. ولاردىڭ ەكونوميكاسى ۇزاققا سوزىلعان سوعىس قيمىلدارى سالدارىنان كۇيرەگەن. ەڭ ارزان قالالاردىڭ وندىعىنا افريكا قالالارى (تۋنيس، الجير جانە لۋساكا)، وڭتۇستىك ازيانىڭ ەكى مەگاپوليسى (پاكىستاننىڭ كاراچي جانە ءۇندىستاننىڭ احمەدابادى)، سونداي-اق ارگەنتينا استاناسى بۋەنوس-ايرەس كىرەدى. الەمدەگى ەڭ ارزان قالالار تىزىمىنە پوستكەڭەستىك كەڭىستىكتەگى قالالار دا ەنگەن: سوڭىندا ءۇشىنشى ورىندا تۇرعان تاشكەنت (وزبەكستان) جانە وزبەكستان استاناسىنان ەكى ورىنعا قالىپ قويعان الماتى (قازاقستان) تۇر.
2021 جىلعى ەسەپتىڭ اۆتورلارى رەيتينگتە 16-شى ورىننان 48-ورىنعا جىلجىعان يتاليا استاناسى ريم ماڭىندا باعانىڭ ەڭ كوپ تومەندەۋىن تىركەدى. تايلاند، پەرۋ، نيدەرلاندى جانە گەرمانيانىڭ استانالارىندا باعا ايتارلىقتاي تومەندەدى. تەگەران ەڭ «قىمبات» قالا دەپ تانىلدى. سانكسيالارعا، ساۋدا شەكتەۋلەرىنە جانە يمپورت باعاسىنىڭ وسۋىنە تاپ بولعان يران استاناسى 50ء-شى ورىننان 29-شى ورىنعا كوتەرىلدى.
تەگەراننان باسقا سوڭعى ءبىر جىلدا باعاسى كوتەرىلگەن العاشقى 10 قالاعا رەيتينگتە بىردەن 13 پوزيسياعا كوتەرىلگەن كييەۆ (ۋكراينا) مەن 96-شى ورىنعا شىققان ماسكەۋ (رەسەي) دا بار.