كوپتىلدىلىك – زامان تالابى

ق ر تاۋەلسىزدىگىنىڭ 30 جىلدىعىنا «ورلەۋ» بىلىكتىلىكتى ارتتىرۋ ۇلتتىق ورتالىعى» اكسيونەرلىك قوعامىنىڭ فيليالى الماتى قالاسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتى قىزمەتكەرلەرىنىڭ ۇيىمداستىرۋىمەن «كوپتىلدىلىك زاماناۋي ءبىلىم بەرۋدىڭ باسىمدىقتارىنىڭ ءبىرى رەتىندە: جاعدايى مەن بولاشاعى» اتتى حالىقارالىق عىلىمي-پراكتيكالىق ونلاين-كونفەرەنسيا قازاق، ورىس، اعىلشىن، فرانسۋز، وزبەك، ۇيعىر تىلدەرىندە ءوتتى.

كونفەرەنسيانىڭ ماقساتى – رەسپۋبليكانىڭ ءبىلىم بەرۋ مەكەمەلەرىندە كوپتىلدىلىكتى ەنگىزۋ بويىنشا ماسەلەلەردى سىندارلى تالقىلاۋ جانە تاجىريبە الماسۋ. ءىس-شارانى ۇيىمداستىرۋعا اتسالىسقان سەرىكتەستەر  – ەقىۇ اۇجك، يۋنەسكو، اقش ەلشىلىگى، سدۋ، رەسەيدىڭ الماتىداعى باس كونسۋلدىعى، الماتى قالاسىنىڭ ءبىلىم باسقارماسى،  الماتى قالاسىنىڭ فرانسۋز اليانسى.
كونفەرەنسياعا اقش، ۋكراينا، موڭعوليا، تاجىكستان، فرانسيا، گەرمانيا، وزبەكستان ەلىنىڭ جەتەكشى ۋنيۆەرسيتەتتەرى مەن عىلىم اكادەمياسىنىڭ وكىلدەرى قاتىستى.

كونفەرەنسيانىڭ پلەنارلىق ءماجىلىسىنىڭ مودەراتورى – «ورلەۋ» بىلىكتىلىكتى ارتتىرۋ ۇلتتىق ورتالىعى» اكسيونەرلىك قوعامىنىڭ فيليالى الماتى قالاسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ ديرەكتورى رايسا سادۆاكاسوۆا: «ءبىز قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا كەزدەسىپ وتىرعانىمىزدى قۋانىشپەن اتاپ وتۋگە بولادى – بۇل قازاق حالقى ءۇشىن ەڭ ماڭىزدى مەرەكە! ءبىزدىڭ مەملەكەت كوپ ۇلتتى، 130-دان استام ۇلت وكىلدەرى تۇرادى. بارلىق ەتنوستىڭ تەڭ قاتار ءومىر ءسۇرۋى، ۇلتارالىق بىرلىك،  ەتنوستاردىڭ تىلدىك قۇقىقتارىنىڭ ساقتالۋى، ءبىلىم الۋ جانە شىعارماشىلىق قاجەتتىلىكتەردى جۇزەگە اسىرۋ ءۇشىن ءتىلدى ەركىن تاڭداۋدى قامتاماسىز ەتۋ – ەلىمىزدەگى ءتىل ساياساتىنىڭ وزەگى. تىلدەردى مەڭگەرۋ ارقىلى جاڭا بىلىمگە قول جەتكىزەمىز»، – دەپ اتاپ ءوتتى. 

پلەنارلىق ماجىلىستە ءسوز العان كونفەرەنسيا قوناقتارى – ەقىۇ-نىڭ از ۇلتتار ىستەرى جونىندەگى جوعارعى كوميسسارىنىڭ ورتالىق ازيا ءبىلىم بەرۋ باعدارلاماسىنىڭ ءبىلىم بەرۋ ماسەلەلەرى جونىندەگى حالىقارالىق ساراپشى-كونسۋلتانتى اتاناسيا ستويانوۆا، ابىلاي حان اتىنداعى ءقازحقجاتۋ قازاق فيلولوگياسى كافەدراسىنىڭ مەڭگەرۋشىسى، فيلولوگيا عىلىمدارىنىڭ كانديداتى، دوسەنت اقبوتا قونىروۆا جانە تاجىكستان، مونعوليا،  اقش-تىڭ جەتەكشى ۋنيۆەرسيتەتتەرى مەن عىلىم اكادەمياسىنىڭ وكىلدەرى بايانداما جاساپ، ەلىمىزدىڭ ءتىل ماماندارى، عالىمدار مەن ۇستازدار كونفەرەنسيا اياسىندا وزەكتى ماسەلەلەرگە ايرىقشا توقتالىپ ءوتتى.

تاجىكستان وكىلدەرى تاجىكستان ءبىلىم اكادەمياسىنىڭ ۆيسە-پرەزيدەنتى يرينا كاريموۆا جانە ابدۋراحمان دجامي اتىنداعى تاجىكستان ءبىلىم اكادەمياسىنىڭ ءبىلىم بەرۋدى دامىتۋ ينستيتۋتىنىڭ اعا عىلىمي قىزمەتكەرى بارنو حاكيموۆا ءوز سوزدەرىندە ۇلتتىق تىلدە وقىتىلاتىن مەكتەپتەردەگى كوپتىلدىلىك باعدارلامالاردىڭ ەرەكشەلىكتەرىن اتاپ ءوتتى.
م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ پروفەسسورى نەگماتجان المەتوۆ ءوز بايانداماسىندا «جاڭاشىلدىق» ساناتىنان «جاپپاي تاجىريبە» ساناتىنا كوشۋ، ءۇشتىلدى ءبىلىم بەرۋ باعدارلامالارىن دامىتۋدىڭ جاڭا تەتىكتەرىن ىزدەۋ جانە ەنگىزۋ تۋرالى پىكىرىن ورتاعا سالدى.

سونىمەن قاتار، موڭعوليالىق ارىپتەستەر: دوكتور (Ph.D) ۋحناا تۋيا، پەداگوگيكالىق دامۋ ورتالىعىنىڭ عىلىمي قىزمەتكەرلەرى حييس گانسۋح جانە زاۋباي زۋلميرا ءوز سوزىندە كوپتىلدى ءبىلىم بەرۋگە قاتىستى ساراپتامالىق جۇمىستارىنىڭ ناتيجەلەرىن بايانداسا، الماتى قالاسىنىڭ ا.روزىباكييەۆ اتىنداعى №153 مەكتەپ-گيمنازياسىنىڭ ديرەكتورى شاۆكات ۋماروۆ ءوزى باسشىلىق جاسايتىن ۇجىمنىڭ جۇمىس تاجىريبەسىمەن ءبولىستى. 
ءسوز كەزەگىندە يۋنەسكو-نىڭ تاۋەلسىز ساراپشىسى، PhD، ق ر پرەزيدەنتى جانىنداعى مەملەكەتتىك باسقارۋ اكادەمياسى فيليالىنىڭ دوسەنتى ساۋلە زەينوللا حالىقارالىق دەڭگەيدەگى اۋقىمدى جيىنعا قاتىسۋشىلاردى ءتىل ماسەلەلەرى بويىنشا ىنتىماقتاستىققا شاقىردى.