ەلىمىزدە اەس سالۋعا قانداي كەدەرگىلەر بار؟
«سامۇرىق-قازىنا» اق باسقارما ءتوراعاسى نۇرلان جاقىپوۆ قازاقستاندا اتوم ەلەكتر ستانسياسىنىڭ قۇرىلىسىنا قاتىستى سۇراقتارعا جاۋاپ بەرىپ، اەس قۇرىلىسىن تەجەيتىن فاكتورلاردى اتادى، دەپ حابارلايدى Almaty-akshamy.kz.
«اەس بولا ما، جوق پا دەگەن شەشىم قابىلداۋ ءۇشىن كوپتەگەن فاكتورلاردى ەسكەرۋ كەرەك. وسى شەشىمدى قابىلداعاننان كەيىن قانداي وندىرۋشىمەن نەمەسە ساتۋشىمەن بىرىگىپ جۇمىس ىستەيتىنىمىزدى ايتا الامىز. بۇگىنگى تاڭدا اەس ورنالاساتىن جەرگە قاتىستى ماسەلە بار ەكەنىن كورىپ وتىرمىز. ورىن تاڭداعاندا سۋ بويىنشا، ەكولوگيا بويىنشا ءبىرقاتار تالاپ قويىلاتىنىن دا ءتۇسىنۋىمىز كەرەك. قازاقستاندا سۋ تاقىرىبى وتە وزەكتى بولىپ وتىر، ترانسشەكارالىق وزەندەر، بالقاش پەن كاسپيي تارتىلىپ كەلەدى»، - دەدى نۇرلان جاقىپوۆ باسپا ءسوز ءماسليحاتىندا.
«سامۇرىق-قازىنا» باسشىسى اتوم ەلەكتر ستانسياسىنىڭ ارزانعا تۇسپەيتىنىن، ونىڭ قۇنى ونداعان ميلليارد دوللاردى قۇرايتىنىن اتاپ ءوتتى.
«بۇل اتوم ەلەكتر ستانسياسى ءوز قۇنىن اقتاۋ ءۇشىن تاريف قانداي بولۋى كەرەك؟ ءبىز مەملەكەت رەتىندە ونداي ءتاريفتى كوتەرە الامىز با؟ ءبارىمىز جارىق قولدانامىز، ۇيالى تەلەفوندارىمىزدى قۋاتتايمىز، ينتەرنەتكە كىرەمىز، تەلەديدار كورەمىز. اەس ورناتساق، ەلەكتر ەنەرگياسىنىڭ قۇنى قانداي بولادى؟ بارلىق فاكتورلاردى ەسكەرۋ قاجەت»، - دەيدى ول.
ن. جاقىپوۆ مۇنداي قىمبات جوباعا دايىنبىز با، اۋەلى سونى شەشۋ كەرەگىن ايتتى.
«ءيا، بىزدە ەنەرگيا تاپشىلىعى بار. ەگەر اەس سالساق، بۇل تاپشىلىق جابىلادى دەپ بولجانعان، ءبىراق قۇرىلىس شامامەن 10 جىلعا سوزىلادى، قوماقتى قاراجات كەتەدى. بۇل ەلەكتر ەنەرگياسىنا اقىنى كىم تولەيدى؟ ءبىز، ءبىزدىڭ بالالارىمىز... سوندىقتان بارلىق تۇرعىدا دۇرىس تالداۋ جۇرگىزۋ قاجەت»، - دەپ تولىقتىردى ول.
«سامۇرىق-قازىنا» باسشىسى اتاپ وتكەندەي، اتوم ەلەكتر ستانسياسىن سالۋ كەزىندەگى تالاپتاردىڭ ءبىرى – جاقسى ۇلكەن سۋ قويماسىنىڭ بولۋى.
«ءقازىر ەسەپتەردى وقىپ جاتىرمىن. ءقازىردىڭ وزىندە كاسپيي مەن بالقاش تارتىلىپ جاتىر. ەگەر ءقازىر بىرەۋىن تاڭداپ، اەس تۇرعىزساق، 10 جىلدان كەيىن سۋ تاعى تارتىلۋى مۇمكىن. جەرگىلىكتى سيپاتتاعى سۇراقتار دا بار. كوپتەگەن ادامدار اەس قاسىندا تۇرعىسى كەلمەيدى»، - دەپ تولىقتىردى نۇرلان جاقىپوۆ.