كوپبالالى وتباسىلار بۇعان دەيىن دە مەملەكەت تاراپىنان قولداۋعا يە بولعان.
بيىلدان باستاپ قازاقستاندا كوپبالالى وتباسىلار ءۇشىن سالىقتىق جەڭىلدىكتەر قاراستىرىپ، جىلىنا 282 ايلىق ەسەپتىك كورسەتكىشكە (اەك) دەيىن، ياعني 1 108 824 تەڭگە كولەمىندە سالىق شەگەرىمى ەنگىزىلەدى، دەپ حابارلايدى aqshamnews.kz
مىسالى، 2024 جىلى 577 مىڭنان استام وتباسىعا جاردەماقى تولەندى، ونىڭ جالپى سوماسى 432 ميلليارد تەڭگەگە جەتتى. ەندى بۇل قولداۋ 2025 جىلى جاڭا سالىق جەڭىلدىكتەرىمەن تولىقتىرىلادى. دەگەنمەن قولداۋ تەك جەڭىلدىكتەرمەن شەكتەلمەيدى.
2025 جىلدىڭ قاڭتارىنان باستاپ، Uchet.kz پورتالى اقپاراتىنشا، كوپبالالى وتباسىلارعا سالىق شەگەرىمىن ەنگىزەتىن قازاقستان رەسپۋبليكاسى سالىق كودەكسىنىڭ بۇرىن توقتاتىلعان ءبولىمى قايتا كۇشىنە ەنەدى. ول اتا-انانىڭ ەكەۋىنە دە قولدانىلادى، ءبىراق 282 ايلىق ەسەپتىك كورسەتكىشتەن اسپايتىن مولشەردە (2025 جىلى 1 108 824 تەڭگە): كوپبالالى وتباسىنىڭ اتا-اناسىنىڭ بىرىنە ءار ايعا 23 اەك (90 436 تەڭگە)؛ كوپبالالى وتباسىنىڭ ءاربىر اتا-اناسىنا ايىنا 12 اەك (47 184 تەڭگە). بۇل جەڭىلدىكتەر ءتورت جانە ودان دا كوپ كامەلەتكە تولماعان بالاسى بار وتباسىلارعا بەرىلەدى. وسىلايشا، 2025 جىلى كوپبالالى وتباسى اي سايىن 90 مىڭ تەڭگەگە جۋىق تابىسىن سالىقتان بوساتا الادى.
سالىق كودەكسىنىڭ 342-بابىنا سايكەس، كوپبالالى وتباسىلار سالىق شەگەرىمدەرىن باسقا جەڭىلدىكتەرمەن بىرىكتىرە الادى. ولاردىڭ ىشىندە: مىندەتتى زەينەتاقى جارنالارى؛ مىندەتتى الەۋمەتتىك مەديسينالىق ساقتاندىرۋعا اۋدارىمدار؛ ستاندارتتى سالىق شەگەرىمدەرى. وسى شەگەرىمدەردىڭ جيىنتىق مولشەرى جىلىنا 564 اەك-كە (2 217 648 تەڭگە) دەيىن جەتۋى مۇمكىن.
ساراپشىلاردىڭ پىكىرىنشە، بارلىق قاجەتتى قۇجاتتار ۇسىنىلعان جاعدايدا، كوپبالالى وتباسىلار سالىق تۇرىندەگى شىعىندى ايتارلىقتاي ۇنەمدەي الادى. سونداي-اق 2025 جىلدان باستاپ دارى-دارمەكتەرگە جۇمسالاتىن شىعىندار ءۇشىن سالىق شەگەرىمىنە 18 جاسقا دەيىنگى اسىراۋىنداعى بالالاردىڭ شىعىندارى دا قوسىمشا ەنگىزىلەدى.