ەلىمىزدە قىركۇيەكتىڭ ەكىنشى جەكسەنبىسىندە وتباسى كۇنى اتاپ وتىلەدى. بيىل مەرەكە 8 قىركۇيەككە، ياعني بۇگىنگە تۇسپا-تۇس كەلىپ تۇر.
قاي زاماندا، قاي ەلدە بولماسىن، وتباسىنىڭ ادامزات ۇرپاعىنا ىقپالى مەن اسەرىن ومىردەگى باسقا ەش نارسەنىڭ كۇشىمەن سالىستىرۋعا بولمايدى. بۇگىنگى كەيىپكەرىمىز تاعدىرىنا مويىماعان مىقتى ايەلدەردىڭ ءبىرى – الماتىداعى ۇلتتىق ۇلاننىڭ 5571 اسكەري ءبولىمىنىڭ قۇجاتتامالىق قامتاماسىز ەتۋ بولىمشەسىنىڭ اعا مامانى كىشى سەرجانت الماگۇل سىرىمبەتوۆا.
— مەن الماتى وبلىسى ەڭبەكشىقازاق اۋدانى قاراكەمەر اۋىلىندا دۇنيەگە كەلدىم. تۋعان اۋىلىمداعى ورتا مەكتەپتە 11 جىل ءبىلىم الدىم. اكەم دۇنيەدەن ەرتە وزدى. انام مەكتەپتەگى قىزمەتىن ىستەپ ءجۇرىپ، مەنى قاتارىمنان قالدىرماي ءوسىردى، ءبىلىم الۋىما مۇمكىندىك جاسادى. انام مەكتەپتە 40 جىل بويى حيميا-بيولوگيا پاندەرىنەن ساباق بەرگەن ارداگەر-ۇستاز، ءقازىر قۇرمەتتى دەمالىستا. ءوزىمنىڭ قولىمدا تۇرادى، جيەندەرىنىڭ ورتاسىندا اياۋلى اجە بولىپ وتىر، — دەيدى ول.
ول بىزگە اسكەري سالاعا قالاي كەلگەنىن اڭگىمەلەپ بەردى.
— ءۇيىمىز 6654 اسكەري ءبولىمىنىڭ ءدال قاسىندا ەدى. اسكەري كيىمدەگى ادامداردى كۇندە كورىپ، قىزىعاتىنبىز. اسكەري قىزمەتشى بولۋ بالا كەزدەن ارمانىم بولدى. ءبىراق ۇيدەگىلەر ونىمدى قۇپتاي قويمادى. 1999 جىلى قازاق مەملەكەتتىك باسقارما اكادەمياسىنىڭ (قازىرگى “نارحوز”) حالىقارالىق بيزنەس جوعارى مەكتەبىن ەكونوميست ماماندىعى بويىنشا ءبىتىردىم. ۇلتتىق ۇلانعا 2011 جىلى كەلدىم. 7552 اسكەري بولىمىنە مەملەكەتتىك ساتىپ الۋ قىزمەتىنە الدىمەن قىزمەتشى بولىپ ورنالاسىپ، كەيىننەن اسكەري قىزمەتكە شاقىرىلدىم. وسىلاي قيىندىعى مەن قىزىعى قاتار جۇرەتىن اسكەري قىزمەتتەگى ءومىرىم باستالىپ كەتتى. كەيىننەن 3650 اسكەري بولىمىنە اۋىستىم، ءقازىر 5571 اسكەري ءبولىمىنىڭ قۇجاتتامالىق قامتاماسىز ەتۋ بولىمشەسىنىڭ اعا مامانىمىن، — دەيدى الماگۇل.
ونىڭ وسىناۋ جاۋاپكەرشىلىگى ۇلكەن قىزمەتكە توسەلىپ كەتۋىنە سول كەزدەگى اسكەري ءبولىم كومانديرى پولكوۆنيك يۋريي ماليسكييدىڭ، تىل جونىندەگى ورىنباسارى پولپولكوۆنيك ەۆگەنيي كۋكۋرەكيننىڭ، كەيىن قارجى قىزمەتىندە پودپولكوۆنيك گالينا مۋننىڭ ەڭبەگى زور بولعان. ال زاپاستاعى سەرجانت گۇلبارشىن قۇلىنبايەۆاعا دەگەن العىسى بولەك، 2016 جىلى قۇپيا بولىمشەسىنە اۋىسىپ كەلگەنىندە، وسى سالانىڭ بۇگە-شىگەسىنە دەيىن ءتۇسىندىرىپ، ونىڭ مىقتى مامان بولىپ شىعۋىنا كوپ ۇلەس قوستى.
الماگۇل سىرىمبەتوۆا — كوپبالالى انا. تۇڭعىشى جاسۇلان قازاق-تۇرىك ليسەيىندە وقىدى. انا جولىن جالعاپ، اسكەري ادام بولدى. پەتروپاۆل قالاسىنداعى ۇلتتىق ۇلان اكادەمياسىنىڭ تۇلەگى. ءقازىر 5571 اسكەري ءبولىمىنىڭ 1-جەدەل ماقساتتاعى باتالونىندا اۆتوموبيل ۆزۆودىنىڭ كومانديرى، اعا لەيتەنانت. ۇلكەن قىزى ىڭكار نارحوز ۋنيۆەرسيتەتى جانىنداعى كوللەدجدىڭ 3-كۋرس ستۋدەنتى. كىشى قىزى جانسايا قازاق باس ارحيتەكتۋرالىق-قۇرىلىس اكادەمياسى كوللەدجىنىڭ 1-كۋرس ستۋدەنتى. ال سۇتكەنجەسى جانسەرى 4 جاسقا تولادى، بالاباقشاعا بارىپ ءجۇر.
باقىتتا انا كەزىندە وزىنە اناسى بەرگەن بارلىق ۇلاعاتتى وسى بالالارىنا بەرىپ ءجۇر. پەرزەنتتەرىنە ۇنەمى ادال، قايىرىمدى، بىر-بىرىڭە قامقور بولىڭدار دەگەندى ايتىپ وتىرادى. ۇيدەگى اۋىزبىرشىلىكپەن، جىلىلىقپەن وسكەن باقىتتى بالا تۇزدە دە تابىستى بولاتىنىنا سەنىمدى. سوندىقتان بارلىق شاڭىراقتاعى بالا مەيىرىمگە، ماحابباتقا قانىپ ءوسسىن دەگەن تىلەگىن دە جەتكىزدى.