ورتا ەسەپپەن 447،1 مىڭ وتباسى قامتىلدى.
ۇستىمىزدەگى جىلدىڭ باسىنان بەرى قازاقستانداعى كوپ بالالى وتباسىلار 188،4 ملرد تەڭگە كولەمىندە جاردەماقى الدى، دەپ حابارلايدى Almaty-akshamy.kz.
«2021 جىلعى قاڭتاردان باستاپ تامىزدى قوسا العانداعى ارالىقتا كوپ بالالى وتباسىلارعا بەرىلەتىن مەملەكەتتىك جاردەماقى تولەمدەرىمەن جالپى سوماسى 188،4 ملرد. تەڭگەگە ورتا ەسەپپەن 447،1 مىڭ وتباسى قامتىلدى، سونىڭ ىشىندە تامىزدا جاردەماقىنىڭ بۇل ءتۇرىن 452،3 مىڭ وتباسى جالپى سوماسى 23،8 ملرد. تەڭگەگە الدى»، – دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
اتالعان مەملەكەتتىك جاردەماقىعا 4 جانە ودان دا كوپ بىرگە تۇراتىن كامەلەتكە تولماعان نەمەسە 23 جاسقا دەيىنگى كۇندىزگى بولىمدە وقيتىن ستۋدەنت بالالارى بار وتباسىلار تابىسىنا قاراماستان ۇمىتكەر بولا الادى.
تولەم مولشەرى بالالاردىڭ سانىنا بايلانىستى سارالانىپ تولەنەدى جانە 2021 جىلى 46 760 تەڭگەنى (4 بالا)، 58 457 تەڭگەنى (5 بالا)، 70 154 (6 بالا) تەڭگەنى، 81 852 تەڭگەنى (7 بالا)، 8 بالاعا – 93 344 تەڭگەنى، 9 بالاعا – 105 012 تەڭگەنى، 10 بالاعا – 116 680 تەڭگەنى، 11 بالاعا – 128 348 تەڭگەنى، 12 بالاعا – 140 016 تەڭگەنى، 13 بالاعا – 151 684 تەڭگەنى، 14 بالاعا – 163 352 تەڭگەنى، 15 بالاعا – 175 020 تەڭگەنى، 16 بالاعا – 186 688 تەڭگەنى قۇرايدى.
ەسكە سالا كەتەيىك، كوپ بالالى وتباسىلارعا ولاردىڭ كىرىستەرىن ەسەپكە الماي بەرىلەتىن جاڭا مەملەكەتتىك جاردەماقى قازاقستاندا 2020 جىلدىڭ 1 قاڭتارىنان باستاپ اتاۋلى الەۋمەتتىك كومەك كورسەتۋدىڭ جاڭا تەتىكتەرىندە كوزدەلگەن تابىسى از جانە كوپ بالالى وتباسىلاردى قولداۋدىڭ ءۇش نەگىزگى باعىتى شەڭبەرىندە ەنگىزىلگەن بولاتىن.