12 مامىر – انالار كۇنى. قازاق قاشاندا اناسىن ارداقتاپ، ارۋلارىن سىيلاي بىلگەن حالىق. بۇل – ەجەلدەن قانىمىزعا سىڭگەن اسىل قاسيەت.
«جۇماق – انانىڭ تابانىنىڭ استىندا» دەمەكشى، قۇدايدان كەيىنگى قۇدىرەت يەسى، ول – انا. ادام – ادام بولعىسى كەلسە، ەڭ الدىمەن اناسىن قاستەرلەۋى ءتيىس. وسى رەتتە انالار كۇنى مەرەكەسى قارساڭىندا ءبىز «كوپ بالالى انالار ءۇشىن ارنايى تۇرعىن ءۇي باعدارلاماسى كەرەك پە؟» دەگەن ساۋالناما جۇرگىزگەن ەدىك.
قۋانىش ايتاحانوۆ، قوعام قايراتكەرى:ءاربىر انا باتىر اتاعىن العان كەزدە
پاتەر تەگىن بەرىلگەنى ءجون– ارينە، كەرەك. ءبىراق ارنايى جوبا جاساماي-اق، تۇرعىن ءۇي باعدارلاماسىنىڭ ىشىنەن كوپبالالى انالارعا ءتۇرلى جەڭىلدىكتەر قاراستىرۋعا بولادى. قازىرگى تاڭدا بىزدەگى ەڭ ۇلكەن ماسەلە، حالقىمىزدىڭ سانى از، دەموگرافيالىق ءوسىم ءماز بولماي تۇر. كەڭ جەرىمىز بار، ونىڭ ءاستى-ۇستىنىڭ ءبارى بايلىققا تولى. ءتىپتى الەمدە جەر اۋماعى جونىنەن توعىزىنشى ورىن الىپ وتىرمىز. ءبىراق حالىق سانى از. ال جان-جاعىمىزداعى الىپ كورشى ەلدەر، ءتىپتى وزبەكستاننىڭ وزىندە جەر از بولعانىمەن، حالقىنىڭ سانى باسىم. كورشى ەلدەردىڭ بىزگە كوزىن الارتىپ وتىرعانىن جاسىرا المايمىز. ولار ءارتۇرلى جولدارمەن ءبىزدىڭ ەلگە كەلىپ، تۇراقتاپ قالۋعا تىرىسىپ جاتىر. سوندىقتان ءبىز قالايدا 2050 جىلعا دەيىن ءوز حالقىمىزدىڭ سانىن 30 ميلليونعا جەتكىزۋىمىز كەرەك. ول ءۇشىن مەملەكەت تاراپىنان بارلىق جاعدايلار جاسالىنعانى ءجون. بىرىنشىدەن، حالىقتىڭ دەنساۋلىعىن جاقسارتۋ، انا مەن بالانى قورعاۋ، وسى ارقىلى حالىقتىڭ ءومىر ءسۇرۋ جاسىن ۇزارتۋ، تۋۋ كورسەتكىشىن جوعارىلاتۋ ءۇشىن اسىرەسە جاس وتباسىلارعا، كوپ بالالى انالارعا جاعداي جاساۋ، شەتەلدەگى قانداستارىمىزدى ەلگە الىپ كەلۋ دەگەن سەكىلدى ءتۇرلى جولداردى قاراستىرۋىمىز قاجەت. وسىنىڭ ىشىندە كوپبالالى انالاردى باسپانامەن قامتۋ ەڭ ءبىرىنشى كەزەكتە تۇرۋى ءتيىس. ءتورت بالادان كوپ تۋعانداردى باتىر انا دەپ ەسەپتەپ، ولارعا بارىنشا جاعداي جاساۋىمىز كەرەك. بىزدە ءاربىر انا ءتورت بالادان كوپ تاپسام ەكەن دەپ ارمانداپ، سوعان ۇمتىلاتىنداي دارەجەگە جەتكىزۋىمىز كەرەك. ول ءۇشىن يپوكەكالىق كرەديت بولسىن نەمەسە جالعا بەرىلەتىن تۇرعىن ۇيلەر بولسىن، ونىڭ پايىزدارى ءۇشىنشى بالادان كەيىن قىسقارتىلىپ، ءتىپتى انا باتىر اتاعىن العان كەزدە پاتەر تەگىن بەرىلگەنى ءجون.
كارىباي تاسشابايەۆ، زاڭگەر:
قايتسەك تە كوبەيۋىمىز كەرەك
– مىندەتتى تۇردە كەرەك. 2050 جىلى دامىعان 30 ەلدىڭ قاتارىنا قوسىلامىز دەسەك، ەڭ ءبىرىنشى كوپبالالى انالارعا جاعداي جاساۋىمىز ءتيىس. ايتپەسە، انا بۇرىشتا، مىنا بۇرىشتا پاتەر جالداپ جۇرگەن قىز-كەلىنشەكتەر ەشقاشان كوپبالالى بولعىسى كەلمەيدى. سەبەبى، الەۋمەتتىك جاعداي دۇرىستالماي، حالىقتىڭ سانىن وسىرەمىز دەۋ بەكەرشىلىك. مەن ءوزىم باسپانا ماسەلەسىمەن ءبىراز جىلداردان بەرى اينالىسىپ كەلەمىن. بۇگىندە جالدامالى پاتەر يەلەرىنىڭ ءوزى كوپبالالى انالاردى ۇيىنە كىرگىزگىسى كەلمەيدى. بالالارى ءۇيىمدى بۇلدىرەدى، شۋلايدى دەپ جولاتپايدى. ءتىپتى كەيبىر شەنەۋنىكتەر ءۇي سۇراپ كەلگەن كوپ بالالى اناعا «ءۇي-جايىڭ جوق بولسا، نەگە بالا كوپ تۋاسىڭ» دەپ ۇرىسقانىن دا ەستىدىك. بۇدان كەيىن قىز-كەلىنشەكتەرىمىز قالاي كوپبالالى انا بولعىسى كەلەدى؟ مەنىڭشە، مۇنداي شەنەۋنىكتەر مەملەكەتتىك باسقارۋعا لايىقتى ەمەس دەپ ەسەپتەيمىن. سوندىقتان كوپ بالا تۋىپ وسىرگەن ايەلدەر ءۇشىن ارنايى تۇرعىن ءۇي باعدارلاماسى وتە قاجەت دەپ ەسەپتەيمىن.