30 تامىز - قازاقستان رەسپۋبليكاسىنىڭ كونستيتۋسياسى كۇنى. اتاۋلى كۇنگە وراي، ح.دوسمۇحامەدوۆ اتىنداعى اتىراۋ ۋنيۆەرسيتەتى اقىلى بولىمدە وقيتىن ستۋدەنتتەر اراسىندا ءداستۇرلى «مەن كونستيتۋسيانى جاتقا بىلەمىن!» كونكۋرسىن وتكىزدى، دەپ حابارلايدى Almaty-akshamy.kz.
شارانىڭ ماقساتى - كونستيتۋسيا كۇنىن اتاپ ءوتۋ، اتا زاڭدى ۇلىقتاپ، جاستاردىڭ قۇقىقتىق ساۋاتىن ارتتىرۋدى كوزدەيدى. كونكۋرسقا قاتىسۋعا ءارتۇرلى ماماندىقتا وقيتىن 250 ستۋدەنت نيەت بىلدىرگەن.
قاتىسۋشىلار كونكۋرستىڭ العاشقى كەزەڭىندە قازاقستان رەسپۋبليكاسى كونستيتۋسياسىنىڭ ەرەجەلەرىن ءبىلۋ دەڭگەيىن انىقتاۋ ءۇشىن 25 سۇراقتان تۇراتىن ساۋالعا جاۋاپ بەردى. ال، ەكىنشى كەزەڭگە سۇرىنبەي وتكەندەر، اتا زاڭنىڭ باپتارىن جاتقا ايتۋدان جارىستى. كونكۋرسقا اتىراۋ قالالىق سوتتىڭ سۋدياسى، پروكۋرور جانە جەكە سوت ورىنداۋشى، ۋنيۆەرسيتەتتىڭ ازاماتتىق قۇقىقتىق پاندەر كافەدراسىنىڭ وقىتۋشىلارى تورەلىك ەتىپ، جەڭىمپازداردى انىقتادى.
كونكۋرس قورتىندىسى بويىنشا 3 ورىندى (30 پايىز جەڭىلدىك) «ەكولوگيا» ماماندىعىنىڭ ستۋدەنتى بوتاكوز ينتيماحوۆا، 2 ورىندى (50 پايىز جەڭىلدىك) قىلمىستىق-قۇقىقتىق پاندەر كافەدراسىنىڭ ستۋدەنتى مەدينا ابدەش الدى. ال باس جۇلدەنى ازاماتتىق-قۇقىقتىق پاندەر كافەدراسىنىڭ ستۋدەنتى جاڭگىر تەمىرحانوۆ ءبىر جىلدىق وقۋىن تەگىن وقۋعا سەرتيفيكات الدى.
داستۇرگە اينالعان كونكۋرس كەلەسى جىلدا دا ءوز جالعاسىن تابادى دەپ جوسپارلانۋدا.