كونستيتۋسياعا ەنگىزىلگەن نەگىزگى تۇزەتۋلەر تۋرالى ساراپشى پىكىرى

ەلىمىزدىڭ جاڭارتىلعان كونستيتۋسياسى ازاماتتاردىڭ سۇراۋى بويىنشا جانە قوعام مۇددەسىنە نەگىزدەلگەن - ساراپشى

30 تامىز – ەلىمىزدىڭ نەگىزى زاڭى قابىلدانعان تاريحي كۇن! بيىل كونستيتۋسيانىڭ رەسمي بەكىتىلۋىنە 27 جىل تولادى، دەپ حابارلايدى Almaty-akshamy.kz.

وسى جىلدار ىشىندە قۇجاتقا بىرنەشە تۇزەتۋلەر ەنگىزىلدى. سوڭعى وزگەرىستەر مەن تۇزەتۋلەر بيىل ماۋسىم ايىندا رەسپۋبليكالىق رەفەرەندۋم وتكىزىلگەننەن كەيىن قابىلدانعانىن ايتا كەتكەن ءجون.

«شىن مانىندە، تۇزەتۋلەر وتە اۋقىمدى كولەمدە بولدى. كونستيتۋسيانىڭ 33 بابىنا بارلىعى 56 تۇزەتۋ ەنگىزىلدى. بۇل اتا زاڭنىڭ ۇشتەن ءبىر بولىگى، ياعني ۇلكەن بولشەگى دەسەك بولادى. كونستيتۋسيالىق رەفورمانىڭ نەگىزگى ماقساتى - قولدانىستاعى مەملەكەتتىك مودەلدى جۇيەلى تۇردە قايتا قۇرۋ. ياعني، كونستيتۋسيالىق تۇزەتۋلەر وتە ماڭىزدى، سەبەبى ول ەلدە جاڭا قۇقىقتىق نەگىز قالىپتاستىرادى. جاڭارتىلعان كونستيتۋسيا - بۇل پرەزيدەنت جاريالاعان جاڭا قازاقستان ءۇشىن، ەكىنشى رەسپۋبليكا ءۇشىن جاڭا قۇقىقتىق نەگىز»، - دەيدى الەمدىك ەكونوميكا جانە ساياسات ينستيتۋتىنىڭ ساراپشىسى ارمان توقتىشاقوۆ.

الەمدىك ەكونوميكا جانە ساياسات ينستيتۋتىنىڭ ساراپشىسى ءمالىم ەتكەندەي، ەلىمىزدىڭ جاڭارتىلعان كونستيتۋسياسى ازاماتتاردىڭ سۇراۋى بويىنشا جانە قوعام مۇددەسىنە نەگىزدەلگەن. اتا زاڭنىڭ وزگەرىستەرى مەن تۇزەتۋلەرى ءبىرىنشى كەزەكتە تاريحي ماڭىزعا يە، سەبەبى رەفورمالار – رەسپۋبليكانىڭ اۋقىمدى ساياسي قايتا  جاڭعىرۋىنىڭ اجىراماس بولىگى.