ينسەلل قالاسىندا (گەرمانيا) كونكيمەن جۇگىرۋدەن الەم كۋبوگىنىڭ شەشۋشى كەزەڭى اياقتالدى، - دەپ حابارلايدى aqshamnews.kz ۇلتتىق وليمپيادا كوميتەتىنە سىلتەمە جاساپ.
بۇل جارىستىڭ ناتيجەسى سپورتشىلاردىڭ الەم كۋبوگىنىڭ جالپى ەسەبىندەگى ورىندارىنا اسەر ەتتى.
نادەجدا موروزوۆا قازاقستان قۇراماسى ساپىندا رەيتينگتە ەڭ جوعارى ناتيجە كورسەتتى. 3000 مەتر قاشىقتىقتا ول بەسىنشى ورىندا مارەگە جەتتى. سونداي-اق موروزوۆا 1500 مەتردە دە ۇزدىك وندىققا ەنىپ، التىنشى ورىندى يەلەندى.
500 مەتر قاشىقتىقتا كريستينا سيلايەۆا ونىنشى ورىندى ساقتاپ قالدى. وسى ديسيپلينادا ەۆگەنيي كوشكيننىڭ ۇزدىك بەستىككە ەنۋگە مۇمكىندىگى جوعارى بولدى. گەرمانياداعى كەزەڭگە دەيىن ول جالپى ەسەپتە جەتىنشى ورىندا تۇرعان ەدى.
ءتۋرنيردىڭ العاشقى كۇنىندە كوشكين ءتورتىنشى ورىن الىپ، رەيتينگتەگى جاعدايىن جاقسارتتى. الايدا الەم كۋبوگىنىڭ سوڭعى كۇنى ول ەرەجە بۇزىپ، ۇپايسىز قالدى. ناتيجەسىندە قازاقستاندىق سپورتشى ۇزدىك وندىقتان شىعىپ، 11-ورىنعا ءتۇستى.
ايەلدەر اراسىنداعى كوماندالىق ءىز كەسۋ جارىسىندا قازاقستان قۇراماسى الەم كۋبوگىن سەگىزىنشى ورىنمەن اياقتادى.
ايتا كەتەيىك، ۇلتتىق قۇرامانىڭ كەلەسى ءىرى حالىقارالىق جارىسى - 2026 جىلى يتاليادا وتەتىن وليمپيادا ويىندارى بولماق.