2026 جىلعى قاڭتار ۇبت-سى باستالعاننان بەرى 90 مىڭعا جۋىق ادام ءوتتى. تالاپكەرلەردىڭ 72%-ى تەستىلەۋدى قازاق تىلىندە، 28%-ى ورىس تىلىندە جانە 71 ادام اعىلشىن تىلىندە تاپسىردى، - دەپ حابارلايدى aqshamnews.kz.
ەكى اپتانىڭ قورىتىندىسى بويىنشا تالاپكەرلەردىڭ 65%-ى شەكتى بالل جينادى. بەس ءپان بويىنشا ورتاشا بالل 61 بالدى قۇرادى. ەڭ جوعارى ناتيجە – 138 بالل.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا 260 تالاپكەر قاتىسقانىن ايتا كەتكەن ءجون.
تالاپكەرلەردىڭ تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياسياعا بەرۋ قۇقىعى بار. تەحنيكالىق سەبەپتەر بويىنشا اپەللياسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياسيا قاراستىرىلعاننان كەيىن جەكە كابينەتتەردە قولجەتىمدى بولادى.
ۇبت-نى وتكىزۋدىڭ ەكى اپتاسىندا 173 ەرەجە بۇزۋشىلىق انىقتالدى. 108 تالاپكەر سمارتفونداردى، شپارگالكالاردى جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 65 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى، ولاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق.
2026 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
ەستەرىڭىزگە سالا كەتسەك، تەستىلەۋگە قاتىسۋعا 187 مىڭعا جۋىق ءوتىنىش كەلىپ ءتۇستى.