كونكي تەبۋدىڭ پايداسىن بىلە ءجۇرىڭىز

دەنى ساۋدىڭ – جانى ساۋ

دەننىڭ ساۋلىعىن، جالپى بۇكىل اعزا بەرىكتىگىن نىعايتۋدا كونكي تەبۋدىڭ پايداسى زور دەپ حابارلايدى Almaty-akshamy.kz اif.ru سايتىنا سىلتەمە جاساپ. 

سونىمەن كونكي تەبۋ كەزىندە مىنانداي ارتىقشىلىقتارعا قول جەتكىزۋگە بولادى.

1.سۇيەكتەردىڭ بەرىكتىگى وزىنە جاقىن ورنالاسقان بۇلشىقەتتەردىڭ ولارعا قانداي قىسىم جاسايتىنىنا بايلانىستى بولادى. كونكيدى تۇراقتى تۇردە تەبۋ ارقىلى سۇيەك تىعىزدىعىنىڭ جاس ەرەكشەلىگىنە بايلانىستى پايدا بولاتىن اۋرۋ - وستەوپوروزدىڭ الدىن الۋعا ۇلەس قوسادى. كونكي تەبۋ بارىسىندا قيمىل-قوزعالىس  تەك اياق بۇلشىقەتتەرىنە عانا اسەر ەتىپ قويمايدى، سونىمەن بىرگە قول جانە جالپى دەنە بۇلشىقەتتەرىنە اسەر ەتەدى. تيىسىنشە، بۇل جەرلەردە سۇيەك تىعىزدىعى دا ارتادى.

2. ءمۇسىن. ءبىر ساعات كونكي تەبۋ بارىسىندا 300–400 ككال جۇمسالادى. قيمىل-قوزعالىس كەزىندە اعزانىڭ بارلىق تىندەرى وتتەگىمەن قامتىلادى، ناتيجەسىندە مايلاردىڭ ىدىراۋىن جىلدامداتىپ، جالپى زاتالماسۋدى بەلسەندەتەدى. بۇعان بۇلشىقەتتەرگە قوسىلعان جوعارى جۇكتەمە  - ارتىق سالماقتان قۇتىلىپ، ءمىنسىز مۇسىنگە قول جەتكىزەدى.

3. مي. كونكي تەبۋ ءپوزيتيۆتى كوڭىل كۇي سىيلايدى ءارى پسيحولوگيالىق قىسىمنان اجىراۋعا كومەكتەسەدى. اسىرەسە اشىق الاڭدارداعى كونكيلەردىڭ پايداسى وراسان. سۋىق اۋا سەرپىلتىپ، جۇيكە جۇيەسىن سەرگىتەدى.  

4. ۆەستيبۋليارلىق اپپارات. كونكيدىڭ تابانى اركەز سەنىمدى قورعان ەمەس. كونكي كيىپ قيمىلداۋ بارىسىندا كەدەرگىلەردى اينالىپ ءوتىپ، مۇزعا بۇرىلعاندا تەپە-تەڭدىكتى ساقتاۋ قابىلەتى ەرىكسىز جاتتىعادى. وسىنىڭ ارقاسىندا قوزعالىستار تەك مۇزدا عانا ەمەس، كۇندەلىكتى ومىردە دە نىق، ءدال، ۇيلەسىمدى بولادى. بۇل كەزەكتە ەڭ جاقسى ناتيجە - مانەرلەپ سىرعاناۋ، ءبىراق قاراپايىم كونكيمەن سىرعاناۋ دا وتە پايدالى.  

5. جۇرەك جانە قان تامىرلارى. مۇز ايدىنىنا تۇراقتى بارۋ جۇرەك سوعىسىن ەداۋىر جاقسارتادى. عالىمداردىڭ ايتۋىنشا، مۇز ۇستىندە كۇندەلىكتى 20-30 مينۋت سىرعاناۋدىڭ ءوزى بولاشاقتا جۇرەك اۋرۋلارىنىڭ الدىن الۋعا كومەكتەسەدى. بەلسەندى قوزعالىس كەزىندە قول مەن اياقتا ورنالاسقان ۇساق پەريفەريالىق تامىرلار اشىلادى. قان تامىرلارى قانمەن تولىعىپ  سونىڭ ارقاسىندا قان قىسىمى بىرتىندەپ جانە تابيعي تۇردە تومەندەيدى. وسىلاي ۇنەمى قوزعالىستا بولاۋ گيپەرتونيانىڭ الدىن الۋعا جاقسى كومەكتەسەدى. 

6. ومىرتقا. كونكي تەبۋ بارىسىندا ارقانى تىك ۇستاعان ءجون، ايتپەسە تەپە-تەڭدىكتى ۇستاۋ قيىندىق تۋعىزادى. وسىنىڭ نەگىزىندە ومىرتقانى ۇستاپ تۇرعان بۇلشىقەتتەر جاتتىعادى، تىك جۇرەتىن بولادى. جاسوسپىرىمدەر ءۇشىن كونكي تەبۋمەن اينالىسۋ ومىرتقا قيسايۋىنىڭ الدىن السا، ەرەسەكتەر ءۇشىن ەرتە وستەوحاندروزدىڭ الدىن الادى. 

7. بۋىندار. كونكيمەن سىرعاناۋ ءتىپتى ەرتە ساتىسىندا ارتروز دياگنوزى قويىلعان ادامدارعا دا رۇقسات ەتىلەدى - بۇل قوزعالىس ينتەرستيسيالدى شەمىرشەكتىڭ تاماقتانۋىن جاقسارتادى. تەك تىم تەز جۇرۋگە، سەكىرۋلەر مەن وتكىر بۇرىلىستارعا تىيىم سالىنادى، سونىمەن قاتار كەزدەيسوق قۇلاپ كەتپەۋ ءۇشىن مۇز جامىلعىسى جاقسى ساپالى بولۋى كەرەك. دەنى ساۋ ادامدار ءۇشىن كونكي تەبۋ بۋىن اۋرۋلارىن بولدىرمايدى.