ءومىر بولعان سوڭ اق پەن قارا، قۋانىش پەن رەنىش قاتار جۇرەتىنى، ءتۇن ارتىنان كۇن شىعاتىنى دا زاڭدىلىق. ءبىراق ادامدار اراسىنداعى قارىم-قاتىناستا ءبارى جاقسى بولسا دەپ ويلايمىز. بىر-بىرىمىزگە دەگەن ىلتيپات-قۇرمەتىمىز ارتا تۇسسە ەكەن دەيمىز. سابىر، ءتوزىم، قايىرىم، مەيىرىم، باۋىرمالدىق تەك ورازا ايىمەن شەكتەلمەگەي دەگەن تىلەگىمىز دە جوق ەمەس.
اۆتوبۋستا
قالا سىرتىنا قاتىنايتىن جالعىز اۆتوبۋستىڭ ايالداماسىندا ادام كۇندە كوپ بولادى. ءتىپتى، كەيدە سىيماي قالىپ، ەكىنشىسىن، ءۇشىنشىسىن كۇتىپ تۇرامىز. ءبىز كۇتكەن اۆتوبۋستىڭ توبەسى كورىنگەننەن ورىن تيسە ەكەن دەپ ءبارىمىز جاپاتارماعاي تار ەسىككە ۇمتىلعاندا، بىرەۋمىزدىڭ سومكەمىزدىڭ باۋى، ەندى بىرەۋىمىزدىڭ شاپانىمىزدىڭ ەتەگى ءىلىنىپ قالىپ، نە ءارى، نە بەرى جىلجي الماي كەپتەلىپ تۇرامىز دا قالامىز. سوسىن ايقاي-شۋ، ءبىر-بىرىن يتەرۋ، نۇقىپ جىبەرۋ، بالاعات سوزدەر باستالىپ كەتەدى. تۇسىنۋگە بولادى، جۇمىستان قايتار كەشكى ۋاقىت، ءبارىنىڭ جۇيكەسى سىر بەرىپ، قاجىپ، شارشاپ تۇرادى. ءبىراق وسى ورازا باستالعالى ءبىزدىڭ اۆتوبۋستىڭ جولاۋشىلارىندا سابىر پايدا بولعان سەكىلدى. بۇرىنعىداي القىن-جۇلقىن ۇمتىلىس ازايعانداي، اۋىز بەكىتكەنى بار، بەكىتپەگەنى بار، ايتەۋىر، ارادا ءبىر كوزگە كورىنبەس سابىر، شىدام، ءتوزىم، قاسيەتتى ايعا دەگەن قۇرمەت بارداي كورىنەدى ماعان.
اينانىڭ ەكى جاعى بولاتىن سەكىلدى، ءبىراق كەشە ەكى ارىپتەس مەتروعا وتىرعانىمىزدا، قازداي ءتىزىلىپ وتىرعان اپ-ادەمى جاستاردىڭ بىردە-بىرى ۇشىپ تۇرىپ ورىن بەرمەدى. ورازا عوي قازىرگى جاستاردىڭ كوبى دەدىك تە قويدىق. دۇرىس. ءبىراق ادامگەرشىلىك، قايىرىم، مەيىرىمدى دە ۇمىتپاساق ەكەن. ورازا ۇستاعانىڭىز ەشكىمگە مىندەت بولماۋى ءتيىس. جالپى، ورازا ۇستاساڭىز دا – ءوزىڭىز ءۇشىن، اۋىزاشار بەرسەڭىز دە – ءوزىڭىز ءۇشىن.
ۇيدە
كەشە ءبىر ەر ارىپتەسىم «ماعان سىرتتا، كافە، مەيرامحانادا اۋىز اشقاننان گورى ۇيدە، بالا-شاعامنىڭ جانىندا اشقان جايلى» دەپ قالدى. جانى بار ءسوز. كۇنى بويى تۇزدە، جۇمىستا، ونىڭ ۇستىنە اشقۇرساق جۇرگەن ەر ادامنىڭ كەشكە شاڭىراعىنا، جاقىندارىنا، اۋىزاشارعا اسىعىپ جەتىپ، ءوزىن دە ساعىنا كۇتكەن بالا-شاعاسىن قۇشاعىنا قىسىپ، ءتورت كوزى تۇگەل، ورتاسىندا وتىرىپ، بۇگىن كىمنىڭ نە تىندىرعانىن سۇراپ، ىستەگەن ىستەرىن قولداپ-قولپاشتاپ قويىپ، ماڭدايى تەرلەپ-تەپشىپ ىشكەنى شايىنىڭ، اسىنىڭ ءسىڭىمدى بولارى انىق.
ال ەكىنشى ءبىر ارىپتەسىم (ايەل) ەتجاقىن تۋىستارىنا اۋىزاشار بەرىپ جاتىپ، داستارحان جيىلار ساتتە مەيماندارىنا قاراتا: «بارىڭىزگە ريزامىن. ءومىر بولعان سوڭ ءتۇرلى جاعدايلار بولادى. وسىناۋ قامشىنىڭ سابىنداي قىسقا عۇمىردا، جانتالاسقا تولى جالعان تىرلىكتە الدەبىرەۋىڭىزدى رەنجىتىپ العان، قاتتى ايتقان ساتتەرىم بولسا، كەشىرىم سۇرايمىن»، – دەدى. مىنە، ورازانىڭ دا، اۋىزاشاردىڭ دا ءبىر سۇننەتى وسى شىعار.