كورمەسى الەمنىڭ جەتەكشى كومپانيالارىنىڭ باسىن قوستى
الماتىدا قازاقستاندىق «تۋريزم جانە ساياحات» اتتى KITF–2023 حالىقارالىق كورمەسى ۇيىمداستىرىلدى. اتالمىش ءىس-شاراعا الەمنىڭ 22 ەلىنەن 258 كومپانيا قاتىستى. ەكسپوزيسيادا ءازىربايجان، ۆەتنام، گرۋزيا، حورۆاتيا، يوردانيا، يتاليا، مالايزيا، مالديۆ ارالدارى، جاپونيا، ت.ب. مەملەكەتتەردىڭ ستەندتەرى قويىلدى.
«الماتى – قازاقستاننىڭ ەڭ ءىرى مەگاپوليسى جانە كەلگەن شەتەلدىك تۋريستەر سانى بويىنشا ابسوليۋتتىك كوشباسشى. قالا ىسكەرلىك، ەكولوگيالىق، مادەني-ەتنوگرافيالىق، تاۋ شاڭعىسى ءتۋريزمىن، سونداي-اق وتباسىلىق دەمالىستى دامىتۋ ءۇشىن ۇلكەن مۇمكىندىكتەرگە يە. قازاقستانعا كەلگەن ءاربىر ەكىنشى شەتەلدىك ءتۋريستىڭ الماتىعا كەلەتىنىن ايتا كەتۋ كەرەك. 2022 جىلدىڭ ءبىرىنشى جارتىجىلدىعىنىڭ قورىتىندىسى بويىنشا قالادا تۋريستەردىڭ جالپى سانى 774،2 مىڭنان استام ادامدى قۇرادى. وتكەن جىلمەن سالىستىرعاندا 1،5 ەسە ءوستى. ىشكى تۋريستەر 1،4 ەسە ۇلعايعان كەزدە شەتەلدىك تۋريستەر سانىنىڭ 2،8 ەسە ءوسۋ ءۇردىسى بايقالدى. 2025 جىلعا قاراي 2،3 ملن تۋريست تارتۋدى جوسپارلاپ وتىرمىز»، – دەدى «Kazakh Tourism» ۇلتتىق rومپانياسى» باسقارما ءتوراعاسى تالعات امانبايەۆ.
KITF حالىقارالىق كورمەسى ەلىمىزدە 2001 جىلدان بەرى ءوتىپ كەلە جاتىر. سونداي-اق، ورتالىق ازياداعى ەڭ ءىرى سالالىق B2B ءىس-شاراسى. جىل سايىن كورمەگە قاتىسۋشى مەملەكەتتەر مەن كومپانيالاردىڭ قاتارى كوبەيىپ كەلەدى.
«كورمەگە وسىمەن بىرنەشە رەت قاتىستىق. قازاقستانداعى ارىپتەستەرىمىزبەن تىعىز بايلانىستامىز. بىزگە الماتى قالاسى ۇنايدى. حورۆاتيا كولەمى جاعىنان كىشكەنتاي مەملەكەت. دەگەنمەن، ءۇش كليماتتىق بەلدەۋى بار. بىزدە تاۋ، تەڭىز، ۇلكەن ورمان، تروپيكالىق ايماق بار. ءتۋريزمنىڭ 70%-ى تەڭىزدىڭ ارقاسىندا دامىپ كەلەدى. جازعى شومىلۋ كەزىندە حالىقتىڭ دا قاراسى قالىڭدايدى. وسىنداي كورمەلەردىڭ ارقاسىندا ەكى ەلدىڭ ءتۋريزمىن ودان ءارى داميدى دەگەن سەنىمدەمىن»، – دەيدى حورۆاتيا تۋريستىك ورتالىعىنىڭ ديرەكتورى رايكو رۋجيچكا.
كورمە بارىسىندا ەلىمىزدىڭ تۋريستىك كومپانيالارى شەتەلدىك كومپانيالارمەن تاجىريبە الماستى. كەلۋشىلەر شەتەلدىڭ مادەنيەتىمەن، اسەم جەرلەرىمەن دە تانىس بولدى. KITF Travel Fest ساياحاتشىلار فورۋمى، «تۇراقتى جوسپارلاۋ قازاقستان رەسپۋبليكاسىنىڭ تۋريستىك سالاسىن دامىتۋدىڭ نەگىزى» تاقىرىبىنداعى حالىقارالىق سەمينارلار ۇيىمداستىردى.
«ءبىز وسى كورمەدە كومپانيانىڭ اتىنان جاپونيانى تانىستىرىپ جاتقانىمىزعا 4 جىلدان استام ۋاقىت ءوتىپتى. كەيىنگى ۋاقىتتاردا قازاق جەرىنەن ساياحاتتاپ كەلەتىن تۋريستەردىڭ سانى ارتقان. جاپون حالقىنىڭ دا قازاق جەرىنە ساياحاتتاپ بارىپ جاتقانىن كورەمىز. وسىلايشا ەكى ەل اراسىنداعى بايلانىس نىعايىپ، ەكى حالىقتىڭ مادەنيەتىمەن تانىس بولعان ادامداردىڭ دا سانى ارتىپ كەلەدى. قاراپ وتىرساق، ساياحاتشىلار كوكتەم مەزگىلىندە ەكى ەل اراسىندا قاتىنايدى. ونىڭ باستى سەبەبى سىزدەردە ناۋرىز مەرەكەسى تويلانسا، بىزدە ساكۋرانىڭ گۇلدەگەن كەزەڭىنە سايكەس كەلەدى»، – دەيدى مەنەدجەر سۋميدا سەي.
وتاندىق تۋريستىك نىساندار داعدارىستى ەڭسەرۋ بويىنشا پراكتيكالىق كەيستەرمەن جانە وسى كەزەڭدە بيزنەستى دامىتۋ جولدارىمەن ءبولىستى. KITF كورمەسىنىڭ ىسكەرلىك باعدارلاماسى تۋريزم ءۇشىن ەڭ وزەكتى ماسەلەلەردى قوزعادى. «دوڭگەلەك ۇستەلدەر»، تۇساۋكەسەرلەر جانە تاقىرىپتىق سەمينارلار ۇيىمداستىرىلدى.
«الماتىدا ۇيىمداستىرىلىپ جاتقان كورمەگە قاتىسقانىمىزعا كوپ جىل بولدى. دەگەنمەن، 2018 جىلدان باستاپ تۇركىستان ءوز الدىنا قالا بولعاندىقتان، تۋريزمگە كوڭىل بولىنە باستادى. مادەني نىسانداردىڭ ارقاسىندا تۋريزمگە دەگەن كوزقاراس تا وزگەرە باستادى. تۋريستىك ينۆەستيسيالىق جوبالار جۇزگە اسىرىلا باستادى. ساياحاتشىلاردىڭ دا سانى ارتا باستادى. 2022 جىلى 252 مىڭ تۋريست كەلگەن. جىل سايىن ساياحاتشىلاردىڭ سانى ارتىپ كەلەدى. بۇل تۋريستەردىڭ قىزعۋشىلىعى تۇركىستانعا ارتا باستاعانىن كورسەتەدى. بىزدە تاريحي، مادەني ەسكەرتكىشتەر وتە كوپ. بۇدان بولەك، ەمدىك ساۋىقتىرۋ ورىندارىن دا ايتا كەتسەك بولادى»، – دەيدى تۇركىستان وبلىسى مادەنيەت جانە تۋريزيم باسقارماسىنىڭ باسشىسى نۇرداۋلەت مەدەۋوۆ.
ەلىمىزدىڭ ءار وڭىرىنەن كەلگەن ماماندار شەتەلدىكتەرگە قازاق حالقىنىڭ تۇرمىس-تىرشىلىگىن، ءسالت-داستۇرىن تانىستىردى. وتاندىق جانە شەتەلدىك ءىرى تۋركومپانيالار مەن سالالىق قاۋىمداستىقتار تاجىريبەلەرىمەن جانە جوسپارلارىمەن ءبولىستى.
«ءبىز الماتى وبلىسى قونايەۆ قالاسىنىڭ اسەم تابيعاتىن تانىستىرۋ ماقساتىندا قاتىسىپ وتىرمىز. سونداي-اق، قازاق حالقىنىڭ ءسالت-داستۇرىن، ۇلتتىق ويىندارىن، كوشپەلى مال شارۋاشىلىعىمەن اينالىسقاندا قالاي ءومىر سۇرگەندىگىن «عۇندار» ەتنواۋىلىنا شاقىرۋ ارىلى كورسەتپەكپىز. بۇل جەردەن ءار اۋىلدان جينالعان قىز-جىگىتتەردىڭ ونەرىن كورۋگە بولادى. ياعني «جىگىتتىك ونەر (دجيگيتوۆكا)»، «اشامايعا مىنگىزۋ»، «قىز قۋۋ»، «كوكپار» ويىندارىن كورسەتەمىز. بۇدان بولەك، كونكۋرستان وتكەن جاستار «سارباز رۋحى» كومانداسىنا قابىلدانادى. ول جەردە حالقىمىزدىڭ ۇلتتىق بولمىسىن بويىنا سىڭىرگەن جاستاردىڭ باسىن قوسامىز»، – دەيدى «عۇندار» ەتنواۋىلىنىڭ جەتەكشىسى ايشا شاكەنوۆا.