سولتۇستىك كيۆۋ پروۆينسياسىنداعى گوما قالاسىنىڭ مەكتەبىندە بۇۇ بىتىمگەرلەرى پودپولكوۆنيك التىنبەك جالمۇحانوۆ پەن مايور باتىر تۇياقوۆ مادەني-بىلىم بەرۋ ءىس-شاراسىن وتكىزدى.
ساباق بارىسىندا اسكەري قىزمەتشىلەر قاقتىعىستاردىڭ الدىن الۋداعى حالىقارالىق كۇش-جىگەردىڭ ماڭىزدىلىعىن اتاپ ءوتتى. كونگوداعى بۇۇ بىتىمگەرلەرىنىڭ مىندەتتەرى، ولاردىڭ بەيبىتشىلىك پەن قاۋىپسىزدىكتى ساقتاۋداعى ءرولى تۋرالى ايتتى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
بىتىمگەرلەر بالالارعا قازاقستان جانە ونىڭ مادەني داستۇرلەرى تۋرالى ايتىپ، اعىلشىن ءتىلى ساباقتارى مەن كوماندالىق رۋحتى دامىتۋعا باعىتتالعان ويىندار وتكىزدى.
– ءبىزدىڭ ەل بۇۇ بىتىمگەرلىك ميسسيالارىنا بەلسەندى قاتىسىپ جاتقانىن ماقتان تۇتامىز. بالالار قازاقستانعا قىزىعۋشىلىق تانىتىپ، تاريحىمىز بەن مادەنيەتىمىز تۋرالى ءبىلدى. مۇنداي ءىس-شارالار حالىقتار اراسىنداعى دوستىقتى نىعايتۋعا ىقپال ەتەدى، – دەپ اتاپ ءوتتى مايور باتىر تۇياقوۆ.
جەرگىلىكتى تۇرعىندار ۇيىمداستىرۋشىلارعا العىستارىن ءبىلدىردى. ءىس-شارا ەلدەر اراسىنداعى مادەنيەتارالىق بايلانىستار مەن ءوزارا تۇسىنىستىكتى نىعايتۋداعى ماڭىزدى قادام بولدى.