قازاقستاندا بالالارداعى كۇردەلى كوز اۋرۋلارىن ەمدەۋ ادىستەرى بەلسەندى تۇردە جەتىلدىرىلۋدە.
الماتىنىڭ بالالار شۇعىل مەديسينالىق كومەك ورتالىعىنىڭ كوز ميكروحيرۋرگياسى بولىمشەسىندە Constellation Vision لازەرلىك حيرۋرگيالىق جۇيەسىنىڭ كومەگىمەن كۇردەلى ۆيترەورەتينالدى پاتولوگيالار كەزىندە وپەراسيالار جۇرگىزىلە باستايدى، دەپ حابارلايدى aqshamnews.kz دەنساۋلىق ساقتاۋ مينيسترلىگىنە سىلتەمە جاساپ.
ۆيترەورەتينالدى حيرۋرگيا جوعارى تەحنولوگيانى قاجەت ەتەتىن تورلى قابىق پەن شىنى ءتارىزدى دەنەنىڭ اۋىر اۋرۋلارىنا ارنالعان وپەراسيالاردى قامتيدى. بۇل باعىت بۇكىل الەمدە بەلسەندى دامىپ كەلەدى.
«الماتىنىڭ بالالار شۇعىل مەديسينالىق كومەك ورتالىعىنىڭ كوز ميكروحيرۋرگياسى بولىمشەسىندە ءبىزدىڭ كىشكەنتاي پاسيەنتتەرىمىز شالا تۋعان نارەستەلەردىڭ رەتينوپاتياسىن، وتباسىلىق ەكسسۋداتيۆتى ۆيترەورەتينوپاتيانى، كواتس رەتينيتىن جانە كوزدىڭ باسقا دا اۋىر اۋرۋلارىن ەمدەۋ بويىنشا وپەراسيادان وتە الادى»، — دەپ اتاپ ءوتتى الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى نازگۇل يمانعالييەۆا.
بۇرىن مۇنداي پاتولوگياسى بار بالالار كۆوتا بويىنشا شەتەلگە جىبەرىلەتىن. ەندى ولار الماتىدا قاجەتتى كومەك الا الادى. سوڭعى جىلدارى قازاقستاندا بالالاردا تورلى قابىق پەن شىنى ءتارىزدى دەنە پاتولوگياسى جاعدايلارىنىڭ ءوسۋى بايقالادى.
«گادجەتتەردىڭ كەڭىنەن قولدانىلۋىن ەسكەرە وتىرىپ، ۆيزۋالدى پاتولوگيا ماسەلەسى وزەكتى بولا تۇسۋدە جانە لازەرلىك كورۋدى تۇزەتۋ بالالار وفتالمولوگياسىنىڭ ماڭىزدى مىندەتى بولىپ تابىلادى. ءبىزدىڭ ورتالىقتىڭ بازاسىندا لازەرلىك ميكروحيرۋرگيانى ەنگىزۋ ەمدەۋگە قولجەتىمدىلىكتى جاقسارتادى جانە ماماندارىمىزدىڭ بىلىكتىلىگىن ارتتىرادى»، - دەپ اتاپ ءوتتى ورتالىقتىڭ ديرەكتورى الىبەك سماعۇلوۆ.
«وسى جىلدىڭ قاڭتار-قازان ايلارى ارالىعىندا 57 قازاقستاندىق بالا ۆيترەورەتينالدىق وپەراسيالار ءۇشىن شەتەلگە شىعۋعا ءماجبۇر بولدى. جاڭا جابدىقتىڭ ارقاسىندا اتا-انالار بۇدان بىلاي شەتەلدەگى وپەراسيالارعا قاراجات ىزدەمەيدى»، - دەپ تولىقتىردى AYALA قورىنىڭ پرەزيدەنتى ايدانا سۇلەيمەنوۆا.
ورتالىق «شيەۆرون» كومپانياسىنىڭ قولداۋىمەن AYALA قايىرىمدىلىق قورىنىڭ ارقاسىندا Constellation Vision زاماناۋي لازەرلىك حيرۋرگيالىق جۇيەسىن الدى.