كونفەرەنسيا ليگاسى: بۇگىن قازاقستاندىق ءتورت كلۋب قارسىلاستارىمەن كەزدەسەدى

بۇگىن ۋەفا كونفەرەنسيا ليگاسىنىڭ ەكىنشى ىرىكتەۋ كەزەڭى اياسىندا قازاقستاندىق ءتورت كلۋب كەزدەسۋ وتكىزەدى.

اتاپ ايتقاندا، «قىزىل-جار» – «وسيەك»، «قايرات» – «كيشۆاردا»، «توبىل» - «لينكولن رەد يمپس» جانە «راكۋۆ» - «استانا» ماچى وتەدى.

اتالعان كەزدەسۋلەردى «Qazaqstan» جانە «Qazsport» تەلەارنالارى تىكەلەي ەفيردە كورسەتەدى، دەپ حابارلايدى Almaty-akshamy.kz.

پەتروپاۆلدىق «قىزىل-جار» ەلوردادا حورۆاتيالىق «وسيەكتى» قابىلدايدى. بۇل ماچ نۇر-سۇلتان ۋاقىتىمەن 18:00-دە باستالادى. ويىندى QAZSPORT تەلەارناسى تىكەلەي ەفيردە كورسەتەدى.

چەمپيوندار ليگاسىنىڭ ءبىرىنشى ىرىكتەۋ كەزەڭىنەن اسا الماعان «توبىل» ءوز الاڭىندا گيبرالتارلىق «لينكولن رەد يمپس» كومانداسىن قابىلدايدى. قوستانايدا وتەتىن ماچ 20:00-دە باستالادى. بۇل كەزدەسۋدى دە QAZSPORT تەلەارناسى كورسەتەدى.

«قايرات» – «كيشۆاردا» ماچى دا جەرگىلىكتى ۋاقىتپەن 20:00-دە باستالادى. الماتىدان تىكەلەي ترانسلياسيانى QAZAQSTAN تەلەارناسى جۇرگىزەدى.

قازاقستاندىق كوماندالار اراسىندا «استانا» عانا العاشقى ويىنىن سىرت الاڭدا وتكىزەدى. ەلوردالىقتار پولشادا «راكۋۆپەن» كەزدەسەدى. ويىن ەلوردا ۋاقىتىمەن 22 شىلدەگە قاراعان ءتۇنى 01:00-دە باستالادى. كەزدەسۋدى QAZSPORT تەلەارناسىنان تىكەلەي ەفيردە كورۋگە بولادى.