قازىرگى تاڭدا قازاقستاندا كونديسيونەر ورناتۋعا تىيىم سالاتىن زاڭ جوق، دەپ حابارلايدى aqshamnews.kz
Krisha مالىمەتىنشە، كەيبىر ديزاين-كودتار عيماراتتاردىڭ الدىڭعى بەتىنە كونديسيونەر قويماۋدى، ورتاق دەكوراتيۆتى قوراپتاردى پايدالانۋدى، سىمدار مەن قۇبىرلاردى كوزدەن تاسا جەردە جۇرگىزۋدى ۇسىنادى. ءبىراق بۇل – مىندەتتى تالاپ ەمەس. كونديسيونەر ورناتۋعا رۇقسات تەك تاريحي عيماراتتار ءۇشىن قاجەت جانە بۇل تالاپ، ەڭ الدىمەن، جاڭا ۇيلەر مەن قۇرىلىس كومپانيالارىنا قاتىستى. قاراپايىم تۇرعىندارعا قاتىسى جوق.
كونديسيونەر ورناتۋ ءۇشىن كورشىلەردىڭ كەلىسىمى تالاپ ەتىلمەيدى، ويتكەنى بۇل قايتا جوسپارلاۋ بولىپ سانالمايدى جانە ورتاق مۇلىككە اسەر ەتپەيدى.
قوعامدا بۇل ماسەلەگە قاتىستى ءتۇرلى تىيىمدار تۋرالى اڭگىمەلەر ايتىلىپ ءجۇر. ولار جاڭا ساۋلەت-قۇرىلىس كودەكسىن تالقىلاۋمەن بايلانىستى. الايدا ول قۇجاتتا كونديسيونەرگە ناقتى تىيىم سالۋ تۋرالى باپ جوق. ءاربىر پاتەر يەسى ەگەر وزگەلەرگە زيان كەلتىرمەسە، ءوز قابىرعاسىنا كونديسيونەر ورناتۋعا قۇقىلى.
– كونديسيونەر ورناتۋ – بۇل قايتا جوسپارلاۋ دا، قايتا جاڭارتۋ دا ەمەس. ول ينجەنەرلىك جەلىلەرگە جانە ورتاق مۇلىككە اسەر ەتپەيدى. كونديسيونەر ءوز قابىرعاڭا ورناتىلادى – بولدى. اكىمشىلىك قۇقىق بۇزۋشىلىقتار كودەكسىندە كونديسيونەرگە قاتىستى باپ جوق. ال 505-باپ مۇلدە باسقا نارسەگە – قوقىس، ينفراقۇرىلىمدى ءبۇلدىرۋ، اعاش كەسۋگە ارنالعان. فاسادتار وعان كىرمەيدى، – دەپ ءتۇسىندىردى زاڭگەر اركاديي رۋبسوۆ.
ايتا كەتەيىك، بۇعان دەيىن كەيبىر بۇقارالىق اقپارات قۇرالدارى مەن الەۋمەتتىك جەلىلەردە كونديسيونەر ورناتقانى ءۇشىن قازاقستاندىقتارعا 78 مىڭ تەڭگە ايىپپۇل سالىنادى دەگەن اقپارات تاراعان بولاتىن. بۇل مالىمەت شىندىققا جاناسپايدى.