قازاقستان مەن جۇڭگو شەكاراسىنداعى "نۇر جولى" وتكىزۋ پۋنكتىندە قحر-عا باعىت العان كولىكتەردىڭ كەپتەلىسكە تۇسكەنى بايقالعان، - دەپ حابارلايدى aqshamnews.kz قارجى مينيسترلىگىنىڭ مەملەكەتتىك كىرىستەر كوميتەتىنە سىلتەمە جاساپ.
ۆەدومستۆو مالىمەتىنشە، وتاندىق تاسىمالداۋشىلاردىڭ شەكارادان وتۋگە قاجەت شەتەلدىك رۇقسات بلانكىلەرىنىڭ بولماۋىنان پايدا بولدى. بۇل بلانكىلەر ەكى ەلدىڭ سالالىق كولىك ۆەدومستۆولارى اراسىندا ءوزارا ايىرباستالادى.
"قالىپتاسقان جاعدايدى رەتتەۋ ماقساتىندا قازاقستان رەسپۋبليكاسى قارجى مينيسترلىگىنىڭ مەملەكەتتىك كىرىستەر كوميتەتى كولىك مينيسترلىگىمەن بىرلەسىپ بەلسەندى جۇمىس جۇرگىزىپ جاتىر. ءقازىر قازاقستان مەن قىتايدىڭ سالالىق ۆەدومستۆولارى قازاقستاندىق تاراپتى قوسىمشا شەتەلدىك رۇقسات بلانكىلەرىمەن قامتاماسىز ەتۋ ماسەلەسى بويىنشا كەلىسسوزدەر جۇرگىزىپ جاتىر"، - دەلىنگەن حابارلامادا.
سونداي-اق، قحر-دىڭ باس كەدەن باسقارماسىمەن دە كەلىسسوزدەر جۇرگىزىلىپ جاتقانى اتاپ ءوتىلدى.
"ناتيجەسىندە جۇڭگو تاراپى قابىلدايتىن اۆتوكولىكتىڭ سانىن ۋاقىتشا ارتتىرۋ جونىندە ۋاعدالاستىققا قول جەتكىزىلدى. سونداي-اق، جۇڭگو وتكىزۋ بەكەتتەرىندە وتكىزۋدى ارتتىرۋ جانە كەدەندىك رەسىمدەۋدى جەدەلدەتۋ جونىندەگى قوسىمشا شارالار كەلىسىلدى"، - دەپ كورسەتىلدى حابارلامادا.
تاسىمالداۋشىلاردىڭ قارجى شىعىنىن بارىنشا ازايتۋ ءۇشىن ق ر قم مكك "CarGoRuqsat" ەلەكترون كەزەك جۇيەسىنىڭ اكىمشىسى – "اەو" اق-مەن بىرلەسىپ، بەلسەندى برونداردىڭ قولدانىلۋ مەرزىمىن 72 ساعاتقا ۇزارتۋ تۋرالى شەشىم قابىلدادى.
"بۇل تاسىمالداۋشىلارعا جۇيەنىڭ جاڭارتىلعان جۇمىس قاعيدالارىنا سايكەس برون ءۇشىن تولەنگەن 1 اەك سوماسىن جانە 20 اەك كولەمىندەگى كەپىلدىك جارنانى ساقتاۋعا، سونداي-اق شەتەلدىك رۇقساتتاردىڭ بەرىلۋى قايتا باستالعاننان كەيىن وتكىزۋ تۇراقتىلىعىن قامتاماسىز ەتۋگە مۇمكىندىك بەرەدى"، - دەپ ءتۇسىندىرىلدى حابارلامادا.
بۇدان بولەك، جۇڭگو حالىق رەسپۋبليكاسىنىڭ كولىك مينيسترلىگىنەن "س" ساناتىنداعى جاڭا رۇقسات بلانكىلەرى پارتياسى تۇسكەننەن كەيىن، ءوتىنىش بەرىپ ۇلگەرمەگەن وتاندىق تاسىمالداۋشىلار بەلگىلەنگەن تارتىپپەن بۇرىن بروندالعان كەزەك ارقىلى بلانكىلەردى راسىمدەپ، الۋعا مۇمكىندىك الادى.
مكك جاعدايدىڭ تۇراقتى باقىلاۋدا ەكەنىن حابارلادى. قابىلدانىپ جاتقان بارلىق شارا اۆتوكولىك وتكىزۋ رەجيمىن جەدەل قالپىنا كەلتىرۋگە جانە كولىك اعىنىنىڭ ۇزدىكسىز قوزعالىسىن قامتاماسىز ەتۋگە باعىتتالعان.
"كوميتەت تۇسىنىستىك تانىتقانى ءۇشىن تاسىمالداۋشىلارعا العىس بىلدىرەدى جانە شەتەلدىك رۇقسات بلانكىلەرىنىڭ جاڭا پارتياسى كەلگەنگە دەيىن وتكىزۋ پۋنكتتەرىنە ۋاقىتشا بارماۋدى سۇرايدى"، - دەلىنگەن حابارلامادا.
ەسكە سالايىق، قىركۇيەتىڭ اياعىندا قازاقستان-رەسەي شەكاراسىندا رف تاراپىنان باقىلاۋدىڭ كۇشەيۋىنە بايلانىستى كەزەك پايدا بولعان ەدى. ق ر كولىك مينيسترلىگىنىڭ مالىمەتىنشە، رەسەيلىك قىزمەتتەر جۇكتەردى تەكسەرۋدى كۇشەيتىپ، كولىكتى قاراۋ ۋاقىتىن ۇلعايتتى جانە قۇجاتتاردى، سانيتارلىق جانە فيتوسانيتارلىق تالاپتاردى تەكسەرۋدىڭ قوسىمشا شارالارىن ەنگىزدى.