باس پروكۋراتۋرا مونيتورينگ ناتيجەسىندە سايلاۋ تۋرالى زاڭنامانى بۇزۋدىڭ 9 فاكتىسىن تىركەدى.
باسقا سايلاۋشى ءۇشىن داۋىس بەرۋ جولىمەن تەڭ سايلاۋ قۇقىعى تۋرالى تالاپتى بۇزعانى ءۇشىن كىنالىلەر اكىمشىلىك قۇقىقبۇزۋشىلىق تۋرالى كودەكستىڭ 108-بابى بويىنشا اكىمشىلىك جازاعا تارتىلادى، دەپ حابارلايدى Almaty-akshamy.kz
باس پروكۋراتۋرا قوعامدىق مۇددەلەردى قورعاۋ قىزمەتى باستىعىنىڭ ورىنباسارى ازامات ءسارعازيننىڭ ايتۋىنشا، زاڭبۇزۋشىلىقتار ءۇش وڭىردە – الماتى وبلىسىنىڭ ەڭبەكشىقازاق، جامبىل، رايىمبەك جانە ۇيعىر اۋداندارىنداعى سايلاۋ ۋچاسكەلەرىندە، جەتىسۋ وبلىسىنىڭ قاراتال جانە كەربۇلاق اۋداندارىنداعى ۋچاسكەلەرىندە، سولتۇستىك قازاقستان وبلىسىنىڭ ايىرتاۋ جانە جامبىل اۋداندارىنداعى ۋچاسكەلەردە تىركەلگەن.
"بۇل زاڭبۇزۋشىلىقتار كوميسسيا مۇشەلەرى تاراپىنان ازاماتتارعا باسقا ادامدار ءۇشىن داۋىس بەرۋگە مۇمكىندىك بەرۋمەن بايلانىستى. ياعني سايلاۋ ۋچاسكەلەرىندە كوميسسيا مۇشەلەرى سايلاۋشىلاردىڭ وتىنىشىمەن ولارعا تۋىسقاندارى ءۇشىن داۋىس بەرۋ ءۇشىن بيۋللەتەن بەرگەن. سول ارقىلى تەڭ سايلاۋ قۇقىعى تۋرالى تالاپتى بۇزعان"، - دەدى سارعازين رەسپۋبليكالىق تەلەارنادا ءوتىپ جاتقان "سايلاۋ– 2023" ونلاين مارافونىندا.
ول بيۋللەتەن بەرگەن بارلىق كوميسسيا مۇشەسى سايلاۋ ۋچاسكەلەرىندەگى جۇمىستان شەتتەتىلگەنىن مالىمدەدى. ءقازىر جەرگىلىكتى پروكۋرورلار ولاردى اكىمشىلىك قۇقىقبۇزۋشىلىق تۋرالى كودەكستىڭ 110-بابى بويىنشا اكىمشىلىك جاۋاپقا تارتۋ ءۇشىن شارالار قابىلداپ جاتىر.
باسقا سايلاۋشى ءۇشىن داۋىس بەرۋ جولىمەن تەڭ سايلاۋ قۇقىعى تۋرالى تالاپتى بۇزعانى ءۇشىن كىنالىلەر اكىمشىلىك قۇقىقبۇزۋشىلىق تۋرالى كودەكستىڭ 108-بابى بويىنشا اكىمشىلىك جازاعا تارتىلادى.
"ءبىراق بۇل ءبىرلى-جارىم جاعداي"، - دەدى باس پروكۋراتۋرا وكىلى.
وسى ورايدا ول سايلاۋ تۋرالى زاڭعا سايكەس، ءاربىر سايلاۋشى ءوزى داۋىس بەرەتىنىن اتاپ ءوتتى. داۋىس بەرۋ قۇقىعىن باسقا بىرەۋگە بەرۋگە جانە سول سياقتى باسقا ادام ءۇشىن داۋىس بەرۋگە تىيىم سالىنادى.
داۋىس بەرۋ باستالعالى بەرى ىقتيمال زاڭبۇزۋشىلىقتار تۋرالى 32 ءوتىنىش تۇسكەن. سونىڭ ىشىندە جەتەۋى باس پروكۋراتۋراعا باعىتتالدى.