كولونيادا دا ءبىلىم بار

اياعىن جازا باسىپ، قىلمىستى بولعان جاسوسپىرىمدەر دە قوعامنان تىس قالمايدى، ورتا ءبىلىم الادى، اتتەستات يەلەنەدى.

الماتى قالاسىنىڭ قىلمىستىق اتقارۋ جۇيەسى دەپارتامەنتىنە قاراستى لا- 155/6 مەكەمەسىندە جازاسىن وتەپ جاتقان جەتكىنشەكتەر ورتا مەكتەپتى بىتىرگەنى تۋرالى اتتەستات الدى.

تۇزەۋ مەكەمەسىندەگى سالتاناتتى جيىن دا ەلىمىزدىڭ انۇرانىمەن باستالدى. ورتاعا 11-سىنىپتى ءبىتىرۋشى تۇلەكتەر سىنىپ جەتەكشىلەرىمەن شىقتى.

لا-155/6 مەكەمە باستىعىنىڭ ورىنباسارى، ادىلەت مايورى داۋرەن ماشيمبايەۆ كولونيا ىشىندە ءبىلىم بەرەتىن مەكتەپتى ءبىتىرىپ جاتقان جەتكىنشەكتەردى مەرەكەمەن قۇتتىقتاپ، بولاشاقتا جاقسى ازامات بولىپ شىعاتىندىقتارىنا سەنىم ءبىلدىردى. مەكتەپتىڭ وقۋ جانە تاربيە جونىندەگى ورىنباسارلارى ليۋدميلا ۆاسيليەۆنا مەن ايزادا ءابدىمادي قىزى دا لەبىزىن جەتكىزدى. باس بوستاندىعىنان ايىرىلىپ، تۇزەۋ مەكەمەسىندە جازاسىن وتەپ جاتقان جاسوسپىرىمدەر اراسىندا بيىل قازاق بولىمىنەن 11-سىنىپتى 11 بالا، ال ورىس ءبولىمىن 1 وقۋشى ءبىتىرىپ،  قولدارىنا ورتا ءبىلىم تۋرالى اتتەستات الىپ، قۋانىشقا بولەندى. ال 4 ەكپىندى وقۋشى ماقتاۋ قاعازىمەن ماراپاتتالدى.

سالتاناتتى ءىس-شارا كونسەرتتىك باعدارلامامەن جالعاسىپ، ان-جىرمەن ورنەكتەلدى. كوككە ءتۇرلى-تۇستى شارلار ۇشىرىلدى. بالالاردىڭ وزدەرى تەمىر تورلى قورشاۋدىڭ ىشىندە جۇرسە دە، ولاردىڭ اسقاق ارمانى جازىلعان شارلار ەش كەدەرگىسىز اسپان الەمىنە جول تارتتى.