الماتى قالاسىنىڭ قىلمىستىق-اتقارۋ جۇيەسى دەپارتامەنتىنە قاراستى №11 مەكەمەدە جامبىل اتىنداعى قالالىق جاسوسپىرىمدەر كىتاپحاناسىنىڭ مادەني ءىس-شارا ۇيىمداستىرۋ ءبولىمىنىڭ قىزمەتكەرلەرىمەن بىرلەسىپ استانا كۇنى اتالىپ ءوتتى.
ءىس-شارانىڭ ماقساتى – ەلىمىزدىڭ باس قالاسى استانا تۋرالى، ونىڭ جەتىستىگى، بارلىق جاقسىسى جايىندا جاسوسپىرىمدەردى حاباردار ەتۋ.
ءىس-شارا كىتاپحاناشىلاردىڭ استانا قالاسى تۋرالى بايانداماسىنان باستالىپ، ەلوردانىڭ تىنىس-تىرشىلىگىن پاش ەتەتىن كىتاپ كورمەسىمەن جالعاستى. تۇزەۋ مەكەمەسىندە جازاسىن وتەپ جاتقان جەتكىنشەكتەر كىتاپپەن سەرىك ەكەنىن بايقاتىپ، استانا تۋرالى ۆيكتورينالىق سۇراقتارعا بەلسەنە قاتىسىپ، بىلىم-بىلىگىن دە ورتاعا سالدى. كىتاپ وقۋعا قۇشتار بالالار سىيلىققا كىتاپ الدى.
ءىس-شارا سوڭىندا №11 مەكەمەنىڭ تاربيە ءبولىمىنىڭ باستىعى، ادىلەت پودپولكوۆنيگى الما قويشىباي قىزى وسىنداي ءىس-شارالار جاسوسپىرىمدەردىڭ ەستەتيكالىق تالعامىن دامىتاتىنىن ايتىپ، جازالى بالالارعا قاتارلاستارىنان قالماي، قوعامعا، ورتاعا دۇرىس تاربيەلى ازامات بولىپ ورالۋىنا تىلەك ءبىلدىردى.