قىزمەتىن ادال اتقارماعان كوللەكتورلار قىلمىستىق جازاعا تارتىلادى.
سوڭعى ەكى جىلدىڭ ىشىندە ءوز قىزمەتىن ادال اتقارماعان 37 كوللەكتورلىق اگەنتتىكتىڭ قىزمەتى توقتاتىلعان بولاتىن، دەپ حابارلايدى Almaty-akshamy.kz
بۇل تۋرالى قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى نۇرلان ءابدىراحمانوۆ ايتتى.
قارجى نارىعىن رەتتەۋ جانە دامىتۋ اگەنتتىگى وسى سالاداعى جۇمىستى جالعاستىرۋعا مۇددەلى. الداعى ۋاقىتتا كوللەكتورلارعا قاتىستى قىلمىستىق جاۋاپكەرشىلىك تە ەنگىزىلەدى.
"بيىل كوللەكتورلارعا قاتىستى اكىمشىلىك جاۋاپكەرشىلىك كۇشەيتىلەدى. سونداي-اق كوللەكتورلىق اگەنتتىكتەردىڭ قىزمەتكەرلەرىنە قاتىستى قىلمىستىق جاۋاپكەرشىلىك ەنگىزىلەدى"، - دەدى ءابدىراحمانوۆ سەناتتىڭ بۇگىنگى وتىرىسىندا.
ونىڭ ايتۋىنشا، بانكتەر مەن كوللەكتورلاردىڭ ءوزارا ارەكەت ەتۋ شارالارى دا كۇشەيتىلەدى.
"سوسىن پروبلەمالىق قارىزداردى قايتا قاراۋ بويىنشا كوللەكتورلاردىڭ جۇمىسىن وڭتايلاندىرامىز"، - دەپ اتاپ ءوتتى ءابدىراحمانوۆ.