الماتىنىڭ ءتورت كوللەدجى تەحنيكالىق جانە كاسىپتىك ءبىلىم بەرۋدىڭ جاڭاشا ۇلگىسىن ۇسىنىپ، قۇزىرەتتىلىك ورتالىقتارىنىڭ جۇمىسىمەن تانىستىردى. قازاقستان پرەزيدەنتىنىڭ باستاماسىمەن جاريالانعان جۇمىسشى ماماندىقتار جىلى اياسىندا قالا اكىمدىگى مەن ءبىلىم باسقارماسىنىڭ قولداۋىمەن كوللەدجدەر ەڭبەك نارىعىندا سۇرانىسقا يە كاسىبي مامانداردى دايارلاۋ تاجىريبەسىن كورسەتتى.
باسپا ءسوز تۋرىن وڭىرلىك كوممۋنيكاسيالار قىزمەتى مەن ءبىلىم باسقارماسى بىرلەسە ۇيىمداستىردى. الماتى كوپسالالى كوللەدجى، الماتى ەنەرگەتيكا جانە ەلەكتروندىق تەحنولوگيالار كوللەدجى جانە الماتى قۇرىلىس-تەحنيكالىق كوللەدجىنىڭ بازاسىندا WorldSkills چەمپيوناتىنا دايىندىق لاگەرلەرى جۇمىس ىستەيدى. مۇندا ەلەكترومونتاج، وندىرىستىك اۆتوماتيكا، اۆتوكولىكتى تەحنيكالىق قىزمەت كورسەتۋ، IT، سانتەحنيكا جانە جىلىتۋ، قۇرعاق قۇرىلىس، دانەكەرلەۋ جانە جيھاز ءوندىرىسى بويىنشا وقىتۋ زاماناۋي جابدىقتار مەن تاجىريبەلى تالىمگەرلەردىڭ باسشىلىعىمەن وتەدى.
الماتى كوپسالالى كوللەدجىنىڭ ديرەكتورى اسىلحان بەيسەتبايەۆتىڭ ايتۋىنشا، تۇلەكتەردىڭ 87%-دان استامى وقۋدى اياقتاعان سوڭ بىردەن جۇمىسقا ورنالاسادى. دۋالدى وقىتۋ اياسىندا بۇل كورسەتكىش 100%-عا جەتكەن. مىسالى، جيھاز ءوندىرىسى باعىتى بويىنشا ستۋدەنتتەر ءبىرىنشى كۋرستان باستاپ وندىرىستىك تاجىريبەدەن ءوتىپ، كەيىن سول كاسىپورىنعا جۇمىسقا ورنالاسادى.
الماتى قۇرىلىس-تەحنيكالىق كوللەدجىنىڭ ءبولىم مەڭگەرۋشىسى باۋىرجان مۇحامەدجانوۆ ستۋدەنتتەردىڭ حالىقارالىق جارىستارداعى جەتىستىكتەرىن اتاپ ءوتتى. جاقىندا پولشا مەن فرانسيادا وتكەن بايقاۋدا قازاقستاندىق ستۋدەنت جۇلدەلى ورىن الىپ، «ۇزدىك مامان» مەدالونىن يەلەنگەن. بۇل — ەلىمىز ءۇشىن بۇرىن-سوڭدى بولماعان جەتىستىك.