كوللەدج ستۋدەنتتەرىنىڭ شاكىرتاقىسى كوبەيەدى

2023 جىلعى 1 قىركۇيەكتەن باستاپ كوللەدج ستۋدەنتتەرىنىڭ ستيپەندياسىن ارتتىرۋ جوسپارلانىپ وتىر.

ۇكىمەت قاۋلىسىنا ەنگىزىلەتىن وزگەرتۋلەر جوباسىنا سايكەس، اشىق نقا پورتالىندا جاريالانعان، دەپ حابارلايدى Almaty-akshamy.kz

        اتاپ ايتقاندا:

• تەحنيكالىق جانە كاسىپتىك ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا جۇمىسشى بىلىكتىلىكتەرى بويىنشا وقيتىن ستۋدەنتتەرگە – 32 681 (ءقازىر 21 787) تەڭگە؛


• تەحنيكالىق جانە كاسىپتىك (ورتا بۋىن ماماندارىن دايارلاۋدى كوزدەيتىن)، ورتا بىلىمنەن كەيىنگى ءبىلىمنىڭ ءبىلىم بەرۋ باعدارلامالارىن ىسكە اسىراتىن ءبىلىم بەرۋ ۇيىمدارىندا ءبىلىم الاتىن ستۋدەنتتەردىڭ مەملەكەتتىك ستيپەندياسى – 31 422 (ءقازىر 20 948) تەڭگە ستيپەنديا تولەنەدى.

ستيپەنديا مولشەرىن ارتتىرۋ بويىنشا قاراجات كولەمىن رەسپۋبليكالىق بيۋدجەت كوميسسياسى قولداعان.

«جالپى ستيپەنديا مولشەرىن ۇلعايتۋ ەل جاستارى ءۇشىن تەحنيكالىق جانە كاسىپتىك ءبىلىم بەرۋدىڭ تارتىمدىلىعىن ەداۋىر ارتتىرادى، كوللەدج ستۋدەنتتەرىنىڭ الەۋمەتتىك جاعدايىن جاقسارتادى جانە تەحنيكالىق جانە كاسىپتىك ءبىلىمى بار كادرلاردى دايارلاۋ ساپاسىنىڭ ارتۋىنا اسەرىن تيگىزەدى»، - دەلىنگەن قاۋلىنىڭ تۇسىندىرمە جازباسىندا.

ەسكە سالايىق، پرەزيدەنتتىڭ «ادىلەتتى قازاقستان: ءبارىمىز جانە ءارقايسىمىز ءۇشىن. ءقازىر جانە ءاردايىم» سايلاۋالدى باعدارلاماسىن ىسكە اسىرۋ جونىندەگى ءىس-قيمىل جوسپارىندا ستۋدەنتتەر ستيپەندياسىنىڭ مولشەرىن 2 ەسە ۇلعايتۋ قاراستىرىلعان.

قاۋلى جوباسى 30 ناۋرىزعا دەيىن جاريا تالقىلاۋعا ۇسىنىلعان.