كەز كەلگەن ادامعا كولىك تاڭداۋ - ومىرىندەگى ماڭىزدى شەشىمدەردىڭ ءبىرى. ءتۇرلى مودەلدىڭ ىشىنەن تالعامىڭىزعا تاپ كەلگەنىن تاڭداۋ وڭايعا سوقپايتىنى انىق. كەيبىرى ءساتتى كولىك ساتىپ الىپ، كەيىن ونى ساتىپ پايدا تاۋىپ جاتادى. ەندى ءبىرى ۇرلانعان كولىكتەرگە كەزىگىپ اقشاسىنان دا، كولىگىنەن دە ايىرىلۋى ىقتيمال. Massaget.kz ءتىلشىسى كولىك الاردا نەگە ءمان بەرۋ كەرەگىنە شولۋ جاسادى، دەپ حابارلايدى اlmaty-akshamy.kz.
نومىرلەر، اۆتوكودتارعا ءمان بەرۋ
ارينە، اۆتوكولىك ساتىپ الاردا ساۋاتتى تەكسەرىستەن وتكىزسەڭىز ۇرلانعان كولىكتى ساتىپ الۋدان ساق بولاسىز. ەڭ الدىمەن نومىرلەر مەن اۆتوكودتارعا ءمان بەرىڭىز. تەمىر تۇلپاردى تەكسەرگەن كەزدە موتورداعى، كورپۋستاعى نومىرلەرگە، كودتارعا نازار اۋدارىڭىز. ءتىپتى مينيمالدى تۇزەتۋلەردىڭ نەمەسە سىزاتتاردىڭ بولۋى - بۇل ماشينانى ساتىپ الۋدان باس تارتۋعا سەبەپ. ارىپتەر مەن كود ساندارى اراسىنداعى قاشىقتى مۇقيات تەكسەرىڭىز. ول بارلىق جەردە بىردەي بولۋى كەرەك.
موتوردا جانە اۆتوكولىكتىڭ باسقا ەلەمەنتتەرىندە بار نومىرلەردى ءتيىستى تەحنيكالىق قۇجاتتاماداعى، سەرۆيستىك كىتاپتارداعى ەنگىزىلگەن ساندارمەن سالىستىرۋ قاجەت. ەگەر قىمبات شەتەلدىك كولىكتى ساتىپ الماق بولساڭىز، بۇل جۇمىستاردى ارنايى مامانعا تاپسىرعان ابزال.
كولىك قاڭقاسىن تەكسەرۋ
بۇل پروسەستى باستاماس بۇرىن يەسىنەن جۇمىس بارىسىندا قانداي ەلەمەنتتەر، بولشەكتەر اۋىستىرىلعانىن سۇراڭىز. ەگەر ساتۋشى ەشتەڭە اۋىستىرىلماعانىن حابارلاعان جاعدايدا جارىقشامداردا، اينەكتەردە، ءارتۇرلى قوندىرعىلاردا بار بەلگىلەردى، كودتاردى تەكسەرگەن ءجون. قاراپايىم تەكسەرىس ارقىلى ساتۋشى ءسوزىنىڭ جالعاندىعىن اڭعاراسىز.
كوبىنە تاجىريبەسى جوق ساتىپ الۋشىلارعا مۇنداي كۇردەلى تەكسەرىس قيىنعا سوعادى. ەگەر ءسىزدىڭ كولىككە قاتىستى ءبىلىمىڭىز تاياز بولسا، بۇل جۇمىستاردى سەنىمدى كولىك ساراپشىسىنا تاپسىرعان ابزال. ويتكەنى ولاردىڭ تاجىريبەسى عانا ەمەس، سونىمەن قاتار، بەلگىلى ءبىر مۇمكىندىكتەرى بار. ماسەلەن، كولىك تۋرالى اقپارات سۇراپ، ءتيىستى ورگاندارعا جۇگىنە الادى. ءبىراق ولاردىڭ جۇمىسىنىڭ اقىسىن ءوزىڭىز تولەۋگە تۋرا كەلەدى.
ۇرلانعان اۆتوكولىك ساتىپ الۋ ىقتيمالدىعىن ازايتۋ ءۇشىن ءسىز جەكە ادامداردان ەمەس، سەنىمدى سالونداردان كولىك تاڭداي الاسىز. ءبىراق بۇل جاعدايدا دا نەگىزگى قۇجاتتامانى تەكسەرۋدى ۇمىتپاۋ كەرەك.