كولىكتى ماس كۇيىندە جۇرگىزگەن ءماسليحات دەپۋتاتى قاماۋعا الىندى

اقتوبەدە كولىكتى ماس بولىپ جۇرگىزگەن ەكس-دەپۋتاتقا سوت ۇكىمى شىقتى.

بۇل تۋرالى  قالالىق اكىمشىلىك قۇقىقبۇزۋشىلىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتى مالىمدەدى، دەپ حابارلايدى Almaty-akshamy.kz.

وقيعا 5 قازاندا بولعان. اقتوبە قالاسىندا بايشيەۆا كوشەسىندە Lexus كولىگىن جۇرگىزگەن 53 جاستاعى ايەلدىڭ جەڭىل ماساڭ حالدە بولعانى انىقتالعان ەدى.

«اكىمشىلىك قۇقىقبۇزۋشىلىق تۋرالى كودەكستىڭ 608 بابى 1-بولىگى («جۇرگىزۋشىنىڭ كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى، سول سياقتى كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋىنا بەرۋ») بويىنشا ءىس قوزعالدى. سوت ۇكىمىمەن ايىپتالۋشى 15 تاۋلىككە قاماۋعا الىنىپ، 7 جىلعا جۇرگىزۋشى كۋالىگىنەن ايىرىلدى»، - دەلىنگەن رەسمي حابارلامادا.

سوت ۇكىمى ءالى زاڭدى كۇشىنە ەنگەن جوق.

ەكس-دەپۋتات ءماسليحاتتىڭ الەۋمەتتىك-مادەني دامۋ جانە جاستار جونىندەگى تۇراقتى كوميسسياسىنىڭ مۇشەسى بولعان. سونداي-اق ول فيتنەس ورتالىقتى باسقارعان. جانجالدان كەيىن ول دەپۋتاتتىق وكىلەتتىگىن توقتاتاتىنى تۋرالى مالىمدەمە جاسادى.

ەستەرىڭىزگە سالا كەتەيىك، بۇعان دەيىن اقتوبە قالالىق ءماسليحاتىنىڭ دەپۋتاتى ءسانيا مۇراتوۆا سوتتىڭ شەشىمىمەن التى اي مەرزىمگە كولىك جۇرگىزۋ قۇقىعىنان ايىرىلعانىن حابارلاعان بولاتىنبىز.