كولىكتەرگە SOS باتىرماسىن ورناتۋ تالاپتارى 4 جىلعا الىنىپ تاستالدى
2023 جىلعى 26 قىركۇيەكتە ماسكەۋدە وتكەن ەەك كەڭەسىنىڭ وتىرىسىندا قازاقستان وتاندىق وندىرۋشىلەر مەن شەتەلدىك اۆتوكولىك وندىرۋشىلەرىنىڭ رەسمي ديستريبيۋتورلارىنىڭ كولىك قۇرالدارىن 2027 جىلعى 31 جەلتوقسانعا دەيىن جەدەل قىزمەتتەردى شاقىرۋعا ارنالعان قۇرىلعىلارمەن نەمەسە جۇيەلەرىمەن (SOS باتىرماسىمەن) جابدىقتاماۋ قۇقىعىن قورعادى، دەپ حابارلايدى almaty-akshamy.kz primeminister.kz سىلتەمە جاساپ
پرەمەر-مينيستردىڭ ورىنباسارى سەرىك جۇمانعارين باستاعان قازاقستاندىق تاراپتىڭ ۇسىنىسىمەن ەاەو-عا مۇشە بارلىق ەلدەر كەلىستى. ءتيىستى وزگەرىستەر كەدەن وداعى كوميسسياسىنىڭ 2011 جىلعى شەشىمىنە ەنگىزىلەدى. وسىلايشا، وتاندىق اۆتوكولىك وندىرۋشىلەرى مەن شەتەلدىك وندىرۋشىلەردىڭ رەسمي وكىلدەرى 2027 جىلدىڭ 31 جەلتوقسانىنا دەيىن جەدەل قىزمەتتەردى شاقىرۋ قۇرىلعىلارىمەن جابدىقتاۋسىز سايكەستىكتى باعالاۋدى جۇرگىزە الادى جانە م جانە N ساناتىنداعى (جۇك جانە جولاۋشىلار تاسىمالى) كولىك قۇرالدارىن اينالىمعا شىعارا الادى.
مۇنداي شەشىم قازاقستاننىڭ اۆتوموبيل سالاسىنىڭ دامۋىنا وڭ اسەرىن تيگىزەدى. كولىك قۇرالدارىنىڭ مودەلدىك جەلىسىن كەڭەيتۋگە جانە قازاقستان نارىعىنا جاڭا برەندتەردىڭ كەلۋىنە ىقپال ەتەتىن بولادى.
ەستەرىڭىزگە سالا كەتەيىك، ەاەو ەلدەرىنىڭ اۋماعىنا اكەلىنەتىن N جانە م ساناتىنداعى جەكە اۆتوكولىكتى شۇعىل جانە جەدەل قىزمەتتەردى شاقىرۋ قۇرىلعىلارىمەن (SOS باتىرماسىمەن) جاراقتاندىرۋ جونىندەگى تالاپتار كەدەن وداعىنىڭ تەحنيكالىق رەگلامەنتىندە ايقىندالعان. بۇعان دەيىن 2024 جىلدىڭ 1 اقپانىنا دەيىن ەاەو ەلدەرىنىڭ اتالعان ساناتتاعى كولىك قۇرالدارىن رەسمي يمپورتتاۋشىلار مەن وندىرۋشىلەر بۇل مىندەتتەمەلەردەن بوساتىلعان بولاتىن.
اۆتوكولىك يەلەرىنىڭ قوندىرعى قۇنىنىڭ قىمباتتىعى (شىعارىلعان جىلىنا بايلانىستى كەدەندىك تازارتۋ قۇنىنىڭ ءىس جۇزىندە 25%)، SOS تۇيمەلەرىن دايىنداۋعا ارنالعان چيپتەر مەن بولشەكتەردىڭ تاپشىلىعى تۋرالى وتىنىشتەرىن نازارعا الا وتىرىپ، سونداي-اق قالىپتاسقان گەوساياسي جاعدايعا بايلانىستى شەتەلدىك اۆتووندىرۋشىلەردىڭ رەسەيلىك سىناق زەرتحانالارىندا اككرەديتتەلگەن وسى قۇرىلعىلاردىڭ ىسكە قوسىلۋىنا باعالاۋ جۇرگىزە الماۋى، مىندەتتى جاراقتاندىرۋ مەرزىمىن ۇزارتۋ ماسەلەسىن قازاقستاندىق تاراپ بىرنەشە رەت كوتەردى. ەندى ەاەو ەلدەرىنىڭ اۋماعىنا ءوز قاجەتتىلىكتەرى ءۇشىن اكەلىنەتىن M جانە N ساناتتاعى كولىك قۇرالدارى 2027 جىلدىڭ 31 جەلتوقسانىنا دەيىن شۇعىل جانە جەدەل قىزمەتتەردى شاقىرۋ جۇيەلەرىمەن مىندەتتى جاراقتاندىرۋ تالابىنان بوساتىلادى.