كولىك ءنومىرىنىڭ سيفرى مەن ارىپتەرىن تاڭداۋ قىزمەتى ەنگىزىلمەك، دەپ حابارلايدى Almaty-akshamy.kz
ەلىمىزدە كولىك ءنومىرىنىڭ سيفرلارى مەن ارىپتەرىن تاڭداۋعا مۇمكىندىك بەرەتىن قىزمەت ءتۇرى ەنگىزىلۋى مۇمكىن. بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين الەۋمەتتىك جەلىدەگى جەكە پاراقشاسىندا جازدى.
«الماتىدا مامانداندىرىلعان حالىققا قىزمەت كورسەتۋ ورتالىعىنا باردىم. ىشكى ىستەر مينيسترلىگىمەن بىرلەسە جوعارى سۇرانىسقا يە اۆتوكولىك نومىرلەرىن ساتۋ قىزمەتىن ەنگىزۋ بويىنشا اۋقىمدى جۇمىس اتقارىلۋدا.
قازىرگى ۋاقىتتا قازاقستاندىقتار مۇنداي مەملەكەتتىك نومىرلەرگە ەلەكتروندى ۇكىمەت پورتالى جانە eGov Mobile موبيلدىك قوسىمشاسى ارقىلى تاپسىرىس بەرە الادى. وتكەن جىلى وتانداستارىمىز شامامەن 6 ملرد تەڭگەگە VIP-نومىرلەردى ساتىپ العان. بيىلعى جىلى 3 ملرد تەڭگەگە 8 مىڭنان استام ءنومىر بەرىلگەن. ماعان باسقا دا ارنالار ارقىلى قاجەتتى نومىرلەرگە تاپسىرىس بەرۋگە بولاتىندىعى تۋرالى اقپارات كەلىپ جاتادى. بۇل جاعدايمەن بارىنشا تانىسپىن. سوندىقتان ءبىز مەملەكەتتىك نومىرلەردى تاڭداۋعا باعىتتالعان قىزمەتتى ەنگىزۋ ماسەلەسىن پىسىقتاپ جاتىرمىز»، - دەيدى ب.مۋسين.
ءمينيستردىڭ ايتۋىنشا، كولىككە ءنومىردى تاڭداۋ قىزمەتى ارقاسىندا ءارىپ بەلگىلەرىن دە ءوز بەتىنشە بەلگىلەۋگە مۇمكىندىك بولادى.
«مۇنداي فۋنكسيانىڭ كومەگىمەن كليەنت كەز كەلگەن ارىپتىك ءنومىر بەلگىلەرىن تاڭداي الادى. مىسال رەتىندە السام، ساتىپ الۋشى ءوز ەسىمىنىڭ العاشقى ءۇش ءارپىن ەنگىزۋ ارقىلى قالاعان نومىرىنە قول جەتكىزە الادى. بۇل قىزمەت تۇرىنە بىزدە ۇلكەن سۇرانىس بار.
بۇگىنگى تاڭدا مۇنداي قىزمەتتى جۇزەگە اسىرۋ ءۇشىن جوعارى سۇرانىسقا يە نومىرلەردىڭ تىزبەسىن ۇلعايتۋدى زاڭنامالىق تۇردە بەكىتۋىمىز قاجەت.
وسى ورايدا، ءبىز پارلامەنتتەن قولداۋ تابامىز دەگەن ۇمىتتەمىز. سەبەبى، وسىنداي نومىرلەردى ساتۋ ارقىلى بيۋدجەتكە قوسىمشا قاراجات تۇسىرەتىن ەدىك»، - دەدى ۆەدومستۆو باسشىسى