كولىك ءمينيسترى ەل وڭىرلەرىنىڭ جول ساپاسىن تەكسەرۋ ءۇشىن جۇمىس ساپارىن باستادى

ەل پرەزيدەنتى قويعان تاپسىرمانىڭ ورىندالۋى اياسىندا ق ر كولىك ءمينيسترى مارات قارابايەۆ وڭىرلەرگە جۇمىس ساپارىمەن شىقتى.

وبلىسارالىق جانە اۋدانارالىق 10 مىڭ شاقىرىم جول ورتا جوندەۋدەن ءوتۋى ءتيىس. ءدال وسى باعىتتاعى جولدارمەن حالىق ءجيى قاتىنايدى.

ءمينيستردىڭ ماڭعىستاۋ، اتىراۋ، باتىس قازاقستان، اقتوبە، قوستاناي، سولتۇستىك قازاقستان جانە اقمولا وبلىسى باعىتىنداعى جۇمىس ساپارى باستالدى، دەپ حابارلايدى aqshamnews.kz سالا مينيسترلىگىنە سىلتەمە جاساپ. 

العاشقى مارشرۋت اقتاۋدان اتىراۋعا دەيىن. “اقتاۋ-جەتىباي-شەتپە” ارالىعىنداعى ورتاشا قايتا جوندەۋ جۇمىستارى جۇرگىزىلىپ جاتقان جولدىڭ جاي-كۇيى تەكسەرىلدى. اعىمداعى جىلى رەسپۋبليكالىق ماڭىزى بار ا-33 "دوسسور-بەينەۋ-سايتەس-شەتپە-جەتىباي-اقتاۋ" اۆتوموبيل جولىن جالپى ۇزىندىعى 60 شاقىرىمدى قۇرايتىن 632-662 شق جانە 662-692 شق ۋچاسكەلەرىندە ورتاشا جوندەۋ جۇمىستارى باستالدى.

بۇل ەكى ۋچاسكە ايماقتىڭ ماڭعىستاۋ اۋدانىندا ورنالاسقان. كۇرە جول ۋچاسكەلەرى II تەحنيكالىق ساناتقا جاتادى. ورتاشا جوندەۋ جۇمىستارى اياسىندا جول جابىنى جاڭارتىلادى. مەردىگەر ۇيىم ورتاشا جوندەۋ جۇمىستارىن تولىق اياقتاعان سوڭ 2 جىل بويى ەكى ۋچاسكەنىڭ بۇزىلماۋىنا كەپىلدىك بەرەدى. كۇرە جولدىڭ جاعدايىن جاقسارتۋ ماڭىزدى. سەبەبى بۇل جول ماڭعىستاۋ ءوڭىرىن ەلىمىزدىڭ باسقا وڭىرلەرىمەن بايلانىستىرىپ تۇر.

ءىسساپار اياسىندا جوعارىدا اتالعان وڭىرلەردىڭ حالقىمەن كەزدەسۋ جانە ازاماتتاردى جەكە قابىلداۋ ۇيىمداستىرىلادى. وزگە دە ايماقتاردىڭ جول جاعدايىمەن تانىسىپ، مينيسترلىككە قاراستى نىساندار تەكسەرىلەدى. اتقارىلۋى ءتيىس جۇمىستار نەگىزگە الىنادى.