قازاقستاندىق جۇرگىزۋشىلەردىڭ جولداعى جانجالى ۆيدەوعا ءتۇسىپ، الەۋمەتتىك جەلىگە تاراپ كەتتى، - دەپ حابارلايدى Almaty-akshamy.kz.
اشۋلانعان جۇرگىزۋشى سول جاق جولاقتاعى كولىكتى توقتاتىپ، كاپوتىنا شىعىپ، اياعىمەن الدىڭعى اينەگىن سىندىرعان. سودان كەيىن ول تومەن ءتۇسىپ، جۇرگىزۋشى وتىرعان جاقتاعى تەرەزەنى جۇدىرىعىمەن ۇرىپ سىندىرىپ، ونى سىرتقا شىعارۋعا تىرىسقان. بۇل كەزدە كولىكتىڭ ىشىندە جۇرگىزۋشىدەن بولەك ايەلى مەن بالاسى بولعان،-دەپ جازادى Tengrinews.kz.
ۆيدەودا ولاردىڭ ءقازىر اۋرۋحانادا جاتقانى ايتىلدى.
وقيعا الماتى وبلىسىندا الماتى – بىشكەك باعىتىنداعى تاسجولدا بولعان.
«28 ماۋسىمىندا جامبىل اۋداندىق پوليسيا بولىمىنە ى ەسىمدى ەر ادام جازباشا وتىنىشپەن جۇگىندى. 1992 جىلى تۋعان بەلگىسىز ادامعا قاتىستى شارالار قابىلداۋ تۋرالى، ول ساعات 19:20 شاماسىندا الماتى - بىشكەك اۆتوجولىندا جول قوزعالىسى ەرەجەلەرىن بۇزىپ، جول كولىك وقيعاسىن جاساعان. بۇل رەتتە ونىڭ كولىگى بۇزاقىنىڭ كەسىرىنەن زاقىمدانعان. بۇل دەرەك ق ر قك-نىڭ 293-بابى 1-بولىگىندە كوزدەلگەن قىلمىستىق قۇقىق بۇزۋشىلىق بەلگىلەرى بويىنشا اۋداندىق پوليسيانىڭ سوتالدى تەرگەۋىنىڭ ءبىرىڭعاي تىزىمىنە تىركەلدى. جەدەل-ىزدەستىرۋ ءىس-شارالارى بارىسىندا پوليسيا قىزمەتكەرلەرى 1993 جىلى تۋعان كۇدىكتى ك ەسىمدى ەر ادامدى ۇستادى»، - دەدى الماتى وبلىسى پوليسيا دەپارتامەنتىنىڭ باسپا ءسوز قىزمەتى وكىلدەرى.
سوت-مەديسينالىق ساراپتاما تاعايىندادى. كۇدىكتىنىڭ كولىگى ۇزىناعاش اۋىلىنداعى مامانداندىرىلعان ايىپپۇل تۇراعىنا قويىلعان.
«سونىمەن قاتار، جول-كولىك وقيعاسى دەرەگى بويىنشا جۇرگىزۋشى ك ەسىمدى ادامعا قاتىستى قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 610-بابى 1-بولىگى بويىنشا اكىمشىلىك ءىس قوزعالدى. قازىرگى ۋاقىتتا بۇزاقىلىق دەرەگى بويىنشا تەرگەۋ امالدارى جۇرگىزىلىپ جاتىر»، - دەدى وبلىستىق پوليسيا دەپارتامەنتىنىڭ باسپا ءسوز قىزمەتىندەگىلەر.