الماتىلىق پوليسيا قىزمەتكەرلەرى “اينا ۇرىسىن” ۇستادى
پوليسەيلەردىڭ مالىمەتىنشە، قازىرگى ۋاقىتتا 31 جاستاعى شاھار تۇرعىنىنىڭ 11 كولىكتىڭ ايناسىن ۇرلاۋعا قاتىسى بار ەكەنى دالەلدەندى، دەپ حابارلايدى Almaty-akshamy.kz.
«بارلىق فاكتىلەر بويىنشا قىلمىستىق ىستەر تىركەلدى. ولار ءبىر وندىرىسكە بىرىكتىرىلگەن. جەدەل ىزدەستىرۋ ءىس-شارالارى بارىسىندا قاسكوي تۇرعىلىقتى جەرىندە ۇستالدى. ودان ساتۋعا دايىنداپ قويعان شەتەلدىك كولىكتەردەن ۇرلانعان كولىك اينالارى تاركىلەندى. ەر ادام تۇنگى ۋاقىتتا تۇرعىن ۇيلەردىڭ اۋلالارىندا ۇرلىق جاساعان. ولاردى نارىق باعاسىنان تومەن باعادا ساتقان. كۇدىكتى نەگىزىنەن Toyota، Lexus، Mercedes كولىكتەرىنە ماماندانعان»، – دەيدى اۋەزوۆ اۋداندىق پب جانىنداعى پوليسيا ءبولىمى باستىعىنىڭ ورىنباسارى تيمۋر مۋلينوۆ.
كۇدىكتى ەش جەردە جۇمىس ىستەمەيدى.
«ول جاقىندا تۇرمەدەن شىقتى. ءبىراق دۇرىس قورىتىندى جاساي الماعان سياقتى. وڭاي اقشا تابۋ مۇمكىندىگى كۇشتى بولدى. قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالىپ، قاماۋعا الۋ تۋرالى سانكسيا بەرىلدى. ونىڭ قالا اۋماعىندا جاسالعان وسىعان ۇقساس قىلمىستارعا قاتىسى بار-جوعى تەكسەرىلەتىن بولادى»، – دەدى تيمۋر مۋلينوۆ.