جۇمىسىڭىزدى اياقتاپ، كوشەگە شىقساڭىز كولىگىڭىزدى ايىپ الاڭىنا الىپ كەتىپتى. وسىنداي جاعدايدا ءسىز الدىمەن قانداي ارەكەتكە كوشۋىڭىز كەرەك؟
جالپى كولىكتى ەۆاكۋاسيالاۋدىڭ كوپتەگەن سەبەپتەرى بار. سولاردىڭ ەڭ ءجيى كەزدەسەتىن ەكى ءتۇرى بار. ول:
ءسىز كولىگىڭىزدى مۇگەدەكتەرگە ارنالعان تۇراققا قويدىڭىز (597-باپ، 4ء-بولىم)؛
ءسىز كولىكتى «اۆتوتۇراققا تىيىم سالىنادى» بەلگىسىنىڭ اۋماعىنا قالدىردىڭىز (597-باپ، 3ء-بولىم).
جالپى جول پوليسياسىنىڭ قىزمەتكەرلەرى كولىگىڭىزدى ەۆاكۋاسيالاماس بۇرىن سىزگە قوڭىراۋ شالىپ، ماشيناڭىزدى ايىپ الاڭىنا الىپ كەتەتىنى تۋرالى ەسكەرتۋى كەرەك. ەگەر ءسىز ونى الىپ كەتپەس بۇرىن كولىككە قايتا ورالساڭىز، پوليسيا قىزمەتكەرلەرى ونى ايىپپۇل تۇراعىنا الىپ كەتۋگە قۇقىعى جوق.
جول پوليسيا قىزمەتكەرلەرى اقبتك-نىڭ 597-بابى بويىنشا سىزگە 10 اەك (36 920 تەڭگە) مولشەرىندە ايىپپۇل سالۋعا مىندەتتى. بۇعان دەيىن دە وسىنداي ارەكەتكە جول بەرىپ، قايتالانعان بولسا وندا ايىپپۇل مولشەرى 15 اەك-كە (55 380 تەڭگە) دەيىن سالىنادى.
ەگەر كولىگىڭىزدى ايىپپۇل تۇراعىنا الىپ كەتكەن بولسا، نە ىستەۋ كەرەك؟
ەڭ العاشقى ارەكەتىڭىز 102 نومىرىنە قوڭىراۋ شالۋ كەرەك. ءسويتىپ، وپەراتورعا ءاۆتوموبيلدىڭ مەملەكەتتىك ءنومىرىن ايتاسىز. ءدال وسى اقپاراتتان كەيىن، وپەراتور سىزگە ەۆاكۋاتوردىڭ بورتتىق ءنومىرى جانە ايىپپۇل الاڭىنىڭ مەكەن-جايى حابارلايدى.
مىنە، وسىدان كەيىن ايتىلعان مەكەن جايداعى ايىپ تۇراعىنا بارىپ، كولىكتى الىپ كەتكەن ينسپەكتوردى كۇتەسىز. ول سول جەردە بولۋى مۇمكىن نەمەسە تاعى باسقا كولىكتەردى ەۆاكۋاسيالاۋعا كەتۋى مۇمكىن.
ينسپەكتور سىزگە ايىپپۇل جازىپ، بازادان وزگە دە بەرەشەكتەرىڭىز بار-جوقتىعىنا كوز جەتكىزۋى ءتيىس. ەگەر بازادا «تازا» بولساڭىز، وندا تەك بۇزعان كىناڭىز ءۇشىن ايىپپۇل تولەيسىز. ەگەردە وزگە قارىزدارىڭىز بولعان جاعدايدا تولىعىمەن تولەۋىڭىزگە تۋرا كەلەدى.
ايىپپۇل تولەنگەننەن كەيىن كولىكتى ەۆاكۋاسيالاعان اۋداننىڭ اكىمشىلىك پوليسيا بولىمىنە بارىپ، ايىپپۇلدى تولەگەنىڭىزدى تۇبىرتەك ارقىلى دالەلدەۋىڭىز قاجەت. مىنە وسىدان كەيىن كولىگىڭىزدى تۇراقتان شىعارۋعا رۇقسات ەتىلەدى.
قىسقاسى، ۋاقىت ۇنەمدەۋ ءۇشىن جولدىڭ تىيىم سالىنعان جەرىنە كولىگىڭىزدى قالدىرىپ، ءبىر كۇن ۋاقىتىڭىزدى سارپ ەتۋىڭىز مۇمكىن. سوندىقتان بارا جەرىڭىزگە الدىن الا جوسپارلاپ ەرتەرەەك جەتىڭىز. سوندا تىيىم سالىنباعان ورىنعا قوياسىز جانە ارتىق شىعىندالماسىڭىز انىق.