كۇنى كەشە الەۋمەتتىك جەلىدە «كوكتوبە» دەمالىس ورنىنا جەكە كولىكپەن شىعۋ قۇنى 7 مىڭ تەڭگە بولعانى تۋرالى اقپارات تاراعان ەدى. وسى جاعدايعا قالا تۇرعىندارى مەن قوناقتارى نارازىلىق ءبىلدىرىپ، باعانىڭ تىم قىمبات ەكەنىن ايتىپ شاعىمداندى. الماتىلىق تۇرعىنداردىڭ ايتۋىنشا، قاراجاتتىڭ قايدا كەتىپ جاتقانى بەلگىسىز جانە وتباسىلى ادامدار ءۇشىن «كوكتوبەگە» كولىكپەن كىرۋگە جاعداي قاراستىرىلۋى كەرەك.
قالا تۇرعىنى سالتانات سولتانقۇلوۆانىڭ ايتۋىنشا، 7 مىڭ تەڭگە قاراپايىم وتباسى ءۇشىن قىمبات. «قالادا تۇرساق تا، دەمالىس ورىندارىنا سيرەك بارامىز. وسى اپتادا بالا-شاعامىزبەن «كوكتوبەگە» كەلدىك. ەڭ ۇلكەنى 7 جاستا، كىشىسى 1 جاستا بولعاندىقتان، كولىكپەن شىعۋدى ءجون كوردىك. ەگەر كولىكپەن وتكىلەرىڭىز كەلسە، 7 مىڭ تەڭگە تولەڭىزدەر دەدى. شىنىمىزدى ايتساق، اڭ-تاڭ بولدىق. بۇل باعا تىم قىمبات بولعاسىن، گازەلمەن كوتەرىلدىك. قالتامىزعا ءبىراز اۋىرلىق ءتۇسىردى. مۇنداي باعا ءبىزدىڭ قالامىزعا تىم قىمبات ەمەس پە؟ كۇن سايىن دەمالىس ورنىنا 100-دەن استام كولىك كىرەدى. كۇنىنە 7 ملن تەڭگە تابىس تابادى دەلىك. تابيعاتتى قورعاۋ ماقساتىندا وسىنداي شارا قابىلداسا، مۇلدەم كولىكپەن ءجۇرۋدى شەكتەۋ قاجەت قوي»، – دەيدى ول.
تۇرعىننىڭ شاعىمىنا «كوكتوبە» اكىمشىلىگى جاۋاپ بەردى. ولاردىڭ ايتۋىنشا، باعانىڭ وسۋىنە ساياباقتاعى اۆتوتۇراقتار سانىنىڭ ازدىعى سەبەپ بولىپ وتىر.
«ساياباقتىڭ اۋماعىندا اۆتوتۇراق ورىندارىنىڭ ازدىعىنان كولىكپەن كىرۋ باعاسى 1 مامىردان باستاپ 5 مىڭ تەڭگەدەن 7 مىڭ تەڭگەگە كوتەرىلدى. جالپى، ساياباققا كىرۋ تەگىن. سول ءۇشىن تۇرعىندار مەن قوناقتار ساياباقتىڭ جۇمىس ۋاقىتىندا جاياۋ دا كوتەرىلە الادى. ال جەكە كولىكپەن كەلگەندەردى كىرۋ قۇنىن تولەگەننەن كەيىن جوعارعى تۇراق ايماعىنا وتكىزەمىز»، – دەيدى «كوكتوبە» اكىمشىلىگى.
- ەكوبەلسەندىلەر مەن تابيعات جاناشىرلارى دەمالىس ساياباعىنا كولىكپەن كوتەرىلۋگە قارسى ەكەندەرىن ايتادى. ال الماتى سىندى الىپ شاھاردا ميلليونعا تارتا كولىك بار. اۋاعا زياندى زاتتاردىڭ 65 پايىزىن تاراتاتىن كولىكتەر قورشاعان ورتاعا اسەر ەتىپ، اۋانىڭ لاستانۋىنا، ادام دەنساۋلىعىنا ءقاۋىپ توندىرەدى. «ادامدار سالاۋاتتى ءومىر سالتىن ساقتاپ، ەڭ بولماسا ساياباقتاردا جاياۋ نەمەسە ۆەلوسيپەدپەن جۇرۋگە تىرىسۋ كەرەك. ەگەر ساياباققا كەلىپ، كولىكپەن اۋانى لاستاساڭىز، تابيعاتقا قيانات كەلتىرگەنىڭىز»، – دەيدى ەكولوگيا دەپارتامەنتى جانىنداعى جاستاردىڭ ەكولوگيالىق باستامالارى كەڭەسىنىڭ ءتوراعاسى ءادىل نۇرپەيىسوۆ.
ايتا كەتكەن ءجون، «كوكتوبە» دەمالىس ورنىنا كىرۋدىڭ 4 جولى بار. اباي– دوستىق داڭعىلىنىڭ قيىلىسىنان №99، №95 اۆتوبۋستارمەن سوڭعى ايالداماعا دەيىن بارىپ، ارى قاراي جاياۋ جەتۋگە بولادى. ەكىنشى جولى اباي الاڭى جانىنان اسپالى جولمەن كوتەرىلۋ. سونداي-اق، جەكە كولىكپەن جانە ساياباق اكىمشىلىگى ۇسىنعان گازەل ارقىلى كوتەرىلۋگە بولادى.