قازاقستان رەسپۋبليكاسى قارۋلى كۇشتەرىنىڭ مەملەكەتتىك اسكەري-تاريحي مۋزەيىندە قازاق ۇلتتىق ونەر ۋنيۆەرسيتەتىنىڭ كوللەدجى مەن كوركەمسۋرەت فاكۋلتەتى ستۋدەنتتەرىنىڭ اۆتورلىق جۇمىستارىنان تۇراتىن «كوكتەمنىڭ لەبى» كورمەسىنىڭ اشىلۋى ءوتتى.
ۇيىمداستىرۋشىلار كورمەنى حالىقارالىق ايەلدەر كۇنى مەن ناۋرىز مەيرامىنا ورايلاستىرىپ وتىر. ستۋدەنتتەر كەسكىندەمە، گرافيكا، ءمۇسىن، سەنوگرافيا، ساندىك-قولدانبالى ونەر جانە ديزاين سەكىلدى ءوز ەڭبەكتەرىن ۇسىندى. مۇراجايدىڭ اتريۋم زالىنا بارلىعى 65 جۇمىس قويىلعان. كورمەنىڭ تاقىرىبىنا سايكەس، ولاردىڭ ءبارى كوكتەمگى تۇستەرمەن جاسالعانىن اڭعارۋعا بولادى.
ۇلتتىق اسكەري-پاتريوتتىق ورتالىقتىڭ باستىعى ارمان اسەنوۆ پەن مەملەكەتتىك اسكەري-تاريحي مۋزەيدىڭ باستىعى ءلاززات ءالجان جينالعانداردى كورمەنىڭ اشىلۋىمەن قۇتتىقتادى. ولار جاس اۆتورلارعا شىعارماشىلىق جولدا ساتتىلىك تىلەپ، العىستارىن جەتكىزدى.
– ءبىزدىڭ قازاق ۇلتتىق ونەر ۋنيۆەرسيتەتىمەن ىنتىماقتاستىعىمىز ءبىرىنشى جىل ەمەس. 2022 جىلى اسكەري-تاريحي مۋزەي مەن ۋنيۆەرسيتەت اراسىندا مەموراندۋم جاسالعان بولاتىن. بۇگىنگى ءىس-شارامىز سول كەلىسىمنىڭ جۇمىس ىستەپ تۇرعانىن كورسەتەدى، – دەپ اتاپ ءوتتى ل. ءالجان.
قازاق ۇلتتىق ونەر ۋنيۆەرسيتەتى كوركەمسۋرەت فاكۋلتەتىنىڭ دەكانى عايني مۇحتاروۆا اتاپ وتكەندەي، بۇل اسكەري-تاريحي مۋزەيدىڭ قولداۋىمەن وتكىزىلىپ تۇرعان ءۇشىنشى كورمە.
– ەكسپوزيسيادا ستۋدەنتتەردىڭ سەمەستر بويى ورىنداعان جۇمىستارى ۇسىنىلىپ وتىر. ءبىز اسكەري مۋزەي باسشىلىعىنا ءوز شىعارماشىلىعىن كەڭىنەن ناسيحاتتاۋدا ستۋدەنتتەردى قولداعانى ءۇشىن العىس ايتامىز، – دەپ قوستى ول.
ءىس-شارا بارىسىندا ستۋدەنتتەر قازاقتىڭ ۇلتتىق كيىمىندە دەفيلە وتكىزىپ، كورەرمەنگە كونسەرتتىك باعدارلاما ۇسىندى.