مايىتتەن قىلمىستىق سيپاتتاعى ءولىم بەلگىسى انىقتالماعان.
2023 جىلعى 14 قاڭتاردا جامبىل وبلىسىنىڭ سارىشاعان ستانسياسىنا جاقىنداعاندا "كوكشەتاۋ - قىزىلوردا" باعىتىنداعى جولاۋشىلار پويىزى ۆاگوندارىنىڭ بىرىندە استانادان شىمكەنتكە دەيىن كۇيەۋىمەن بىرگە جولعا شىققان 54 جاستاعى ازاماتشا كەنەتتەن قايتىس بولدى، دەپ حابارلايدى Almaty-akshamy.kz.
Polisia.kz مالىمەتىنشە، سول كۇنى شۋ ستانسياسىنداعى جەلىلىك پوليسيا بولىمىندە سوتقا دەيىنگى تەرگەۋ باستالعان، ال مايىتتەن قىلمىستىق سيپاتتاعى ءولىم بەلگىسى انىقتالماعان.
"تەكسەرۋ بارىسىندا ايەلدىڭ 2019 جىلدان باستاپ استاناداعى اۋرۋحانالاردىڭ بىرىندە سوزىلمالى اۋرۋمەن ەسەپتە تۇرعانى بەلگىلى بولدى. پويىز جولسەرىكتەرىنىڭ كەلىسىمىمەن، كۇيەۋى ايەلىنىڭ ءمايىتىن ورالعان كۇيىندە پويىزدىڭ جۇمىس ىستەمەيتىن تامبۋرى ارقىلى شىمكەنت ستانسياسىنا دەيىن تاسىمالداپ، جەتكىزگەن"، - دەلىنگەن حابارلامادا.
ەر ادام سوت-مەديسينالىق ساراپتامادان ۇزىلدى-كەسىلدى باس تارتقان. قازىرگى ۋاقىتتا پويىزدا ءمايىتتى تاسىمالداۋ دەرەگى بويىنشا ماتەريال جامبىل وبلىسى بويىنشا كولىكتىك باقىلاۋ ينسپەكسياسىنا بەرىلگەن.