10 جىلدا ۆلاديسلاۆ شىن مانىندە نە بولعانى تۋرالى ءبىر ءسوز ايتپاعان، ءقازىر ءبارىن ايتىپ بەرگەن.
باس پروكۋراتۋرانىڭ قىزمەتكەرى ءومىر بويىنا سوتتالعان ۆلاديسلاۆ چەلاحتان جاۋاپ الدى، دەپ حابارلايدى Almaty-akshamy.kz Elmedia-عا سىلتەمە جاساپ.
«جالپى، ۆلاد جۇما سايىن بىزگە حابارلاسادى. ەگەر ماعان حابارلاسپاسا، تۋىستارىنىڭ بىرىنە حابارلاسادى. كەشە بىزگە حابارلاسقان جوق. ازداپ ۋايىمداي باستادىق. بۇگىن حابارلاسىپ، كەشە اپپاراتتىڭ ىستەن شىققانىن ايتتى. ول باس پروكۋراتۋرادان ءبىر جاس قىزمەتكەر كەلگەنىن، ەسىمى ەسىندە قالماعانىن، وسى پروكۋرور وزىنەن ەكى كۇن جاۋاپ العانىن ايتتى. ۆلاديسلاۆ وعان ايتقىسى كەلگەنىنىڭ ءبارىن ايتقانىن، ىسكە قاتىسى بار ادامداردىڭ بارلىعىنىڭ ەسىمىن اتاپ، ەسىمىن بىلمەيتىندەرىن اۋىزشا سيپاتتاپ بەرگەنىن جەتكىزدى. بۇعان دەيىن باس پروكۋراتۋرادان باسقا پروكۋرور ءىستى سۇراتىپ العان»، – دەدى سوتتالۋشىنىڭ اناسى سۆەتلانا ۆاششەنكو.
ايەلدىڭ ايتۋىنشا، سوڭعى 10 جىلدا ۆلاديسلاۆ «شىن مانىندە نە بولعانى تۋرالى ءبىر ءسوز ايتپاعان، ءقازىر ءبارىن ايتىپ بەرگەن». دەگەنمەن 14 ارىپتەسى مەن قورىقشىنىڭ ولىمىنە كىنالى دەپ تانىلعان جىگىتتىڭ تۋىستارىمەن سويلەسۋ ۋاقىتى شەكتەۋلى، 2-3 مينۋت قانا بەرىلەدى ەكەن.
ايتا كەتەيىك، جاقىندا ۆلاديسلاۆ چەلاح پرەزيدەنتكە جولداعان حاتىندا تەرگەۋشىلەردىڭ «قاجەتتى ايعاق الۋ ءۇشىن» ءوزىن ازاپتاپ، پسيحوتروپتىق دارى-دارمەك قولدانعانىن ايتقان.
2012 جىلدىڭ 28 مامىرىندا قازاق-قىتاي شەكاراسىندا ورنالاسقان «ارقانكەرگەن» شەكارا بەكەتىندە قايعىلى وقيعا بولدى. مامىردىڭ اياعىندا «ارقانكەرگەندەگى» شەكاراشىلارمەن بايلانىس كەنەت ۇزىلگەن. سودان كەيىن ول جەرگە جاساق جىبەرىلگەن. 30 مامىردا «ارقانكەرگەنگە» جىبەرىلگەن جاساق شەكارا بەكەتىنىڭ جانىپ كەتكەنىن حابارلادى.
ءبىر كۇننەن كەيىن ۇلتتىق قاۋىپسىزدىك كوميتەتىنە قاراستى شەكارا قىزمەتى ورتەنىپ كەتكەن عيماراتتان 12 ادامنىڭ سۇيەگى، ال كەلەسى كۇنى تاعى ەكى شەكاراشىنىڭ مۇردەسى تابىلعانىن مالىمدەدى. سونداي-اق ءبىر قورىقشىنىڭ ءمايىتى تابىلعان.
4 ماۋسىمدا شەكارا بەكەتىنەن 24 شاقىرىمدا ورنالاسقان قىستاۋلاردىڭ بىرىندە شەكاراشى ۆلاديسلاۆ چەلاح ۇستالدى. ول كەزدە قاراعاندىلىق جىگىت 19 جاستا بولعان.
ەڭ العاش ۇستالعان كەزدە چەلاح قىلمىسىن مويىنداعان، ءبىراق كەيىن سوتتا بارلىعىن جوققا شىعاردى. ول وزىنە قىسىم جاسالعانىن، كىنانى مويىنداۋعا ءماجبۇر بولعانىن، ەشكىمدى ولتىرمەگەنىن مالىمدەدى.
بۇل ءىس بويىنشا سوت ۇكىمى 2012 جىلى 11 جەلتوقساندا شىقتى. سوت چەلاحتى 15 ادامدى ءولتىردى دەپ تانىپ، ءومىر بويىنا باس بوستاندىعىنان ايىردى.
چەلاح 2013 جىلدىڭ ناۋرىزىنان باستاپ قوستاناي وبلىسى، ءجىتىقارا اۋدانىنداعى ءومىر بويىنا باس بوستاندىعىنان ايىرىلعان ازاماتتارعا ارنالعان «قارا بۇركىت» دەپ اتالاتىن مەكەمەدە جازاسىن وتەپ جاتىر.