وسىلاي دەپ دابىل قاققان اتا-انالار رەداكسيامىزعا حابارلاستى.
الماتى وبلىسى، قاراساي اۋدانىنا قاراستى كوكوزەك مەكتەبىنىڭ وقۋشىلارى مەكتەپكە تاسىمالدايتىن اۆتوبۋسقا جارىماي وتىر، دەپ حابارلايدى Almaty-akshamy.kz ءتىلشىسى.
ەلتاي اۋىلدىق وكرۋگىنە قاراستى اقسەڭگىر، كوكتوعان اۋىلدارى مەن وگونوك، سويۋزپەچات، اقسۇڭقار ساياجاي بىرلەستىگىندە مەكتەپ جوق بولعاندىقتان، وسى اتالعان قونىستىڭ وقۋشىلارى كوكوزەكتەگى اياداي مەكتەپكە قاتىناپ وقيدى. ال وسى بالالاردى تاسىمالدايتىن اۆتوبۋستار وتە ەسكى، سوندىقتان دا ءجيى بۇزىلىپ، وقۋشىلار ساباقتان قالىپ قويادى.
«ءقازىر كۇن سۋىتا قويعان جوق، الدىمىز قىس، سوندا نە بولماق؟ ءۇش بالام دا وسى مەكتەپتە وقيتىندىقتان اۆتوبۋستىڭ جىرى ماعان ءمالىم، ول اۆتوبۋستار اپتاسىنا بىرنەشە رەت بۇزىلادى دا جاتادى. بۇل بىرنەشە جىل بويى قايتالانىپ، ءالى كۇنگە شەشىمىن تاپپاي كەلە جاتقان ماسەلە. وسى اۋىلدىڭ تۇرعىنى رەتىندە ەلتاي اۋىلدىق وكرۋگىنىڭ اكىمىنەن ماسەلەمىزدى شەشىپ بەرۋىن سۇرايمىن. قالاداعىداي سكۋلباس بەرمەسە دە، جولدا قالدىرمايتىن جاڭا اۆتوبۋس بەرسىن»، دەيدى اقسەڭگىر اۋىلىنىڭ تۇرعىنى ايجان.
«بۇل جىل سايىنعى جىر. اۋىلىمىزدا مەكتەپ جوق، مەكتەپ سالىنادى دەگەلى ون شاقتى جىلدىڭ ءجۇزى بولدى، ازىرشە بالالارىمىز اۆتوبۋستىڭ ازابىن تارتىپ ءجۇر. ساعات 8-دە بولاتىن ساباققا بالانى تاڭعى 7 بولماي الىپ كەتەدى، ساباعى بىتكەن سوڭ دا بالامىز ۇلكەن سىنىپتىڭ ساباعى اياقتالعانشا كۇتىپ دالادا جۇرۋگە ءماجبۇر، سەبەبى اۆتوبۋس جەتىسپەيدى، بالا سانى كوپ. بارلىق ماسەلەنى شەشەتىن «ەستيتىن ۇكىمەت» بار كەزدە ءبىزدىڭ جانايقايىمىزعا دا قۇلاق اساتىن قۇزىرلى ورىن تابىلار دەگەن ۇمىتتەمىز»، دەيدى وگونوك ساياجاي بىرلەستىگىنىڭ تۇرعىنى، كوپ بالالى انا شىرىن.
اتا-انالاردىڭ ايتۋىنشا، كوكوزەك مەكتەبىندە ساباق 3 اۋىسىممەن، 6 كۇن وقىتىلادى، وعان ۇنەمى بۇزىلا بەرەتىن اۆتوبۋستىڭ جىرى قوسىلىپ شارشاتتى دەپ وتىر.
ءبىز قۇزىرلى مەكەمەنىڭ جاۋابىن ەستۋ ءۇشىن، اكىمدىككە قوڭىراۋ شالىپ ەدىك، تەلەفونعا جاۋاپ بەرگەن حاتشى قىز اكىمنىڭ كەڭسەدە جوعىن جانە جەكە بايلانىس ءنومىرىن بەرە المايتىنىن ايتتى. ءبىراق اۆتوبۋسقا جارىماعان مەكتەپتىڭ ماسەلەسىن الداعى ۋاقىتتا دا قوزعايتىن بولامىز.