مەملەكەتتىك رامىزدەر كۇنىنە وراي كونفەرەنسيا ءوتتى
الەۋمەتتىك قىزمەتتەر ۇيىندە ق ر مەملەكەتتىك رامىزدەرى كۇنىن مەرەكەلەۋ شەڭبەرىندە قوعام قايراتكەرلەرىنىڭ، تاريحشىلاردىڭ، ساراپشىلاردىڭ، ۇكىمەتتىك ەمەس ۇيىمدار وكىلدەرىنىڭ جانە جاستاردىڭ قاتىسۋىمەن «كوك تۋدىڭ جەلبىرەگەنى» تاقىرىبى اياسىندا كونفەرەنسيا ۇيىمداستىرىلدى.
ءىس-شارا الماتى قالاسى قوعامدىق دامۋ باسقارماسىنىڭ قولداۋىمەن وتكىزىلدى. ءىس-شارانىڭ باستى ماقساتى – وسكەلەڭ ۇرپاقتىڭ بويىندا پاتريوتتىق سەزىمدى تاربيەلەۋ، مەملەكەتتىك رامىزدەردى ناسيحاتتاۋ، ازاماتتاردىڭ ءوز ەلىنىڭ سالت-داستۇرلەرىنە، تاريحى مەن مادەنيەتىنە دەگەن قىزىعۋشىلىعى مەن قۇرمەتىن ساقتاۋ.
مەملەكەتتىك رامىزدەر – بۇل كەز كەلگەن مەملەكەتتىڭ ەگەمەندىگى مەن ءبىرتۇتاستىعىن بەينەلەيتىن، ونىڭ اجىراعىسىز اتريبۋتتارىنىڭ ءبىرى. مەملەكەتتىك تۋ، مەملەكەتتىك ەلتاڭبا جانە مەملەكەتتىك گيمن قازاقستان رەسپۋبليكاسىنىڭ مەملەكەتتىك رامىزدەرى بولىپ تابىلادى.
«قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋسيالىق زاڭ 2007 جىلى 4 ماۋسىمدا قابىلداندى. وسى زاڭعا سايكەس جىل سايىن 4 ماۋسىم قازاقستان رەسپۋبليكاسىندا مەملەكەتتىك رامىزدەر كۇنى بولىپ مەرەكەلەنىپ كەلەدى.
«ەلىمىزدىڭ تاريحىندا مەملەكەتتىك رامىزدەر قوعامدىق ساياسي مادەنيەتتىڭ ءبىر بولىگى بولا وتىرىپ، ءار ۋاقىتتا بىرلىككە شاقىرۋدىڭ، ۇلتتىق ماقتانىش پەن پاتريوتتىق سەزىمدى قالىپتاستىرۋدىڭ ماڭىزدى قۇرالى رەتىندە قىزمەت اتقارىپ كەلەدى. جاس ازاماتتارىمىزدى پاتريوتتىق تاربيەگە، قوعامنىڭ رۋحاني بىرلىگىن قۋاتتاندىراتىن قۇندىلىقتارعا باۋليتىن نەگىزگى قۇرال – مەملەكەتتىك رامىزدەرىمىزدىڭ مايەگىندە جاتىر. وسىنىڭ ارقاسىندا مەملەكەتىمىز ەگەمەندىگىن الىپ، تورتكۇل دۇنيەگە تەرەزەسى تەڭ مۇشە بولىپ قوسىلعان كەزدەن بەرگى جاس تولقىن بۋىنى وتانىنا، مەملەكەتتىك رامىزدەرىنە دەگەن شىنايى، پاك سىي-قۇرمەتتى تۇلا بويىنا تەرەڭ سىڭىرۋدە»، - دەدى الماتى قالاسى قوعامدىق دامۋ باسقارماسىنىڭ باسشىسى ايدار ەسەنبەكوۆ.
سونىمەن قاتار پاتريوتتىقتتىڭ ەرەن ۇلگىسىن كورسەتۋ، رامىزدەردىڭ ءمان-ماڭىزى تۋرالى ءبىرقاتار ويلار ايتىلدى.
«مەملەكەتتىك رامىزدەر مەملەكەتتىڭ بەلگىسى. جاس ۇرپاقتىڭ پاتريوتتىق سەزىمىن ارتتىرۋ ماڭىزدى. ءبىز جاستار اراسىندا، بابالارىمىزدىڭ وتكەن تاريحىن ۇعىندىرىپ، وتانسۇيگىشتىك، العا ۇمتىلۋشىلىق سەزىمدەرىن كۇشەيتە بەرگەن ابزال. شىن پاتريوت بولعان ءاربىر قازاقستاندىق وتانعا قالتقىسىز قىزمەت قىلادى دەپ بىلەمىز. سوندىقتان ءبارىمىز رامىزدەرگە قۇرمەتپەن قاراۋىمىز قاجەت»، - دەدى الماتى قالاسىنىڭ ارداگەرلەر كەڭەسىنىڭ ءتوراعاسى احان بيجانوۆ.
مەملەكەتتىك رامىزدەردىڭ تۇپكى ماقساتى مەملەكەتتىكتى دايەكتەي تۇسەتىن ايشىقتى بەلگى ەكەندىگىنە ءمان بەرىلدى.
«ءبىزدىڭ مەملەكەتىمىزدىڭ رامىزدەرىنىڭ ماڭىزىنا اسا ءمان بەرگەن ءجون. دۇنيەجۇزىلىك ساياسي ارەنادا تۋىمىزدىڭ ماڭگى جەلبىرەپ تۇرۋىن ءاربىرىمىز قالايمىز. سوندىقتان رامىزدەردىڭ سيمۆوليكاسىنىڭ ۇعىمى ايرىقشا بولعانى اسا قۇندى سانالادى. قازاق ەلىنىڭ دەربەستىگى ماڭگى بولسىن»، - دەدى ساياساتتانۋشى اسحات قاسەنعالي.